Tura, Nov 8: Re.anggipa July aro August jao National Investigation Agency (NIA) maming dos grigipa Fr Stan Swamy SJ-ko rim.e Mumbai pattoko donengani gimin jegale West Garo Hills-ni Tura Based Christian Churches (TBCC), dingtangdingtang toromo bebe ra.giparang, Tura songjinmani ma.gipa pagiparang aro gipin dilgiparang November 8 Robibar salo mombatirangko so.e, Tura Circuit House junction-o jinma tom.dake bi.chakaniko dakangaha.
Ia tom.aniko Hawakhana Mondolini Rev Frithing D.Sangma tom.aniko padot ong.e dilangaha. Rev Frithing Sangma jinmana aganprakengon rim.ako man.gipa bilsi 83 ong.gipa Fr. Stan Swamy Jesuit-ni Priest ong.achim, ua saksa songsalna kam ka.gipa aro Adebashi jatna dangdike on.enggipa ong.achim. Ua da.o Mumbai pattoko donge bang.a neng.nikaniko man.enga ine uni seatgipa chittio janapatenba an.tangna bi.chakchina mol.molataha. Rev Frithing-ni agana gitade, Fr Stan Swamy a.songo bobil dake chakatenggipa dolrang baksa nangrime kam ka.enga ine chanchichipanio NIA rim.ahachim, indiba ua maming dos dongjachim.
Uni gimin Fr.Stan Swamy-ko ta.rake pattokoniko watpilchina TBCC Isolo bi.chakan baksa India a.songni Prime Minister Narendra Modi-na memorandum-ko see November 9 tarik Sombar salo West Garo Hills-ni Deputy Commissioner (DC)-ni jak gita on.atgen ine parakataha.
