Tura, Oct 9: Bilsianti ong·atrongenga gita ia bilsini chang 44-gipa dama bol 100-ko doke Wangalaniko ong·atgnigipana nangenggipa tangka-paisarangko chimongsona gita Garo Heritage Village, mija Sonibar salo Tura-ni Chibagre picnic spot-o jatni dakbewalo cha·susaani aro ringsusaaniko ong·atangaha.
Ia susagrikaniko ong·atangani salo a·jani Deputy Commissioner Pa Ram Singh mongsonggipa sokgipa ong·e bakko ra·angaha jeon West Garo Hills a·jani dingtang dingtang biaprangchi manderang re·bae ia susaanio bak ra·angtokaha. Manderangni susagrikaniko chekna gita panel-na songako man·gipa sakbri a·gipi officer-rangara – Home Guard Commandant, Pa P. T. Sangma; GHADC-ni Chief Forest Officer, Pa Rangku N Sangma; South Garo Hills-ni Soil & Water Conservation-ni Sub Divisional Officer Pa John Oswin S. Momin aro Garo Heritage Village-ni secretary, Pa Rakkan Sangma-maang ong·a.
Cha·susaanio skanggipa biap-ko Salmera A. Sangma man·angaha, indake Bilman G. Momin aro Bikromjit A. Sangma-maangko skanggipa aro gnigipa runners up-na seokangskaaha.
A·chik jatni bewalo chu song·ako ring·susaanio, Buripara-oni Panjak Ch. Sangma skanggipa biapko man·angaha indake apsan songoni Manme Ch. Sangma aro Chajing Ch. Sangma-maangko skanggipa aro gnigipa runners up-na basee seokangskaaha. Indake ong·engon, Ranggol Kime sala chong·motan, pong dal·oniko chubokko changsano ringrokna amgipako basee seokanganio Jotil Ch. Sangma saksasan chu·sokgipa ong·skaiaha.
Ia Food & Drinks competition-ko ong·ataniara A·chik jatni dakbewal-rikbewalrang aro cha·a-ringani bewalrangni gimaangroroenganiko ripingna gita miksonge ong·ataha.
