Tura, Nov 15: Malaysia a•songo donggipa Penang Adventist Hospital aro Vellore-o donggipa Christian Medical College-ni specialist doctor-rang, Garo Hills-ona re•bae, Sombar saloni a•bachenge Jengjal Sub Divisional Hospital aro Tura-oba salgittamna indin porikka ra•e nianirangko aro sanna bannanirangko on•enga.
Tura Dakkopgre-o donggipa SMELC building-o indin porikka ra•e nianiko aro an•seng baljoke dongani bidingo agan-ku•pattie on•anikoba Malaysia a•songoni re•bagipa doctor-rang on•enga aro Jengjal Sub-Divisional Hospital-oba apsan daken, changgipa sapgipa doctor-rang, manderangna sanna bananirangko on•enga.
Jengjal hospital-o kamko ka•enggipa Dr Denyl-ni parakatani gitade, Sombar salonin ia medical aro health camp-ko ong•atengani gimin bang•bea manderangan an•tangtangni saanirangko ra•e sanna bananirangko ra•na gita re•batokaha.
“Sombar salo skanggipa sal ong•genchimoba bang•bea manderang sanna bananirangko ra•na re•batokahani gimin ia hospital-ni surgery department-o doctor-rang jakchakgija gita ong•pilaha. Mongolbar aro Budbar salrangode chinga bang•bate manderangko sokbana ka•dongsoenga,” ine Dr Denyl aganaha.
Koborko on•ani gitade, health camp-ko ong•atanio Malaysia-oni re•bagipa doctor sakgniba hospital-ni doctor-rangna dakchakanirangko on•aha aro uamangna CMC Vellore-oni medical-ko poraienggipa chatro chatrirang dakchakanirangko on•enga.
Tura-ni SMELC Building-o ong•atenggipa health camp-o simsakbataniko ba nambate sanna bananiko nangenggipa manderangkode Jengjal-ona watate sanna bananirangko dakskaenga ineba kobor on•aha.
