Tura, July 16: World War I ba skanggipa a•gilsak gimikni dakgrikanio English aro nangrimgimin dolrangna dakchakna gita re•ange France a•songo sianggipa manderangko gisik ra•na gita Sukrobar salo, Garo Hills gimikon Garo Labour Corps Day-ko maniangaha.
Bilsi ritchasamangna skang, France a•songona re•anggipa A•chik matgrikrangoni bang•batan ia dakgrikanio janggitangtangko gimaatna nangtokaha aro bang•gijasan songtangtangona sokbapilaiahachim.
Ia salko gisiko ra•e maniani somoio Tura Municipal Board-ni Chairman JD Sangma aro TMB-ni chief executive officer (CEO) Rikse R Marak, sianggipa matgrikrangko mande ra•pilskaani chin Tura Babupara-o tarie dongipa cenotaph-o pul aro malarangko donangaha.
Ia salko manianio dingtangmancha First World War-o sianggipa A•chik matgrikrangko aro France a•songona re•anggipa manderangko mande ra•pilskana gita dingtangmancha minute gni jrip donge bi•chakanikoba dakangaha.
A•gilsak gimikni skanggipa dakgrikanio India a•songni British sorkari, A•chikrangonikoba sak 500 matgrikrangko English aro bakrimgimin dolrangna dakchake on•na gita France a•songona watatahachim. Ia dakgrikanio English aro bakrimgipa dolrang, German-rangko warachakengachim aro ua biapona A•chikrangko bosturangko chiltimna, ramarangko tarina aro uandakgipa kamrangko ka•timna rimangahachim.
Ia kamna A•chikrangoniko sak 1000 matgrikrangko rimahaoba, sak 500-kosan seokaiaha aro ia sak 500-oni mitamrangde ramaon siangahani gimin sak 456 matgrikrangsan France a•songona sokangaiahachim.
Ia dakgrikani 1918 bilsini May 25 tariko bon•aha aro dakgrikani matchotahaon A•chikrangko India a•songona watatpilna gita France a•songni Marseilles port-ona watataha.
France a•songoni re•bapilenba A•chikrang 1918 bilsini July 16 tariko Tura-ona sokbapilaha indiba France a•songona sokanggipa sak 456 matgrikrangoni sak 120-san noktangona tange sokbapilaiaha.
Iani giminsa Garo Labour Corps Day-ko 1918 bilsionin bilsiantian Garo Hills-o, ka•dongbee a•gilsak gimikni dakgrikanio sorkaritangna dangdike on•na re•angahani gimin July 16 tariko manirongenga.
