Kamrup, Feb 11: Assam a·doko songdongenggipa A·chikrang ru·utbea bilsirangoni Garo Autonomous Council (GAC)ko on·china dabiengon, United Garo Autonomous Council Movement Committee (UGACMC)ni dilgiparangni chanchichenggija Assam sorkarini on·gipa Garo Development Council (GDC)ko ra·chakangani gimin Assam a·doko songdongenggipa A·chikrang mijal Butbar salo Kamrup district-ni Santipur-o jinma tom·e jegalaniko dakangaha.
Assam State Zone-ni Garo National Council (GNC)ni padot Arbithson G. Momin-ni mijalo Hub News-na seachi u·iatani gitade, Assam-ni A·chikrang GDC-ko ra·chakna man·chongmotjawa, GAC-nan kingkot dabiangkugen ine janapatengon, UGACMC-ni dilgiparang Alex K. Sangma, Crossbell Marak aro Thengsil Sangma-maang Assam sorkari baksa melie maiba man·gnina miksonge sorkarini on·gipa GDC-ko ra·chakaha ine matnangataha.
UGACMC-ni indakgipa ong·gija kamko Assam a·dokni GNC, Garo Youth Council (GYC) aro Garo Women Council (GWC) nangrime jegalaniko dakenba, batanggimin 2010 bilsioni Assam-ni A·chikrang GAC-na dabibaenga, uni gisepon UGACMC-ni dilgipa Mahendra Baruah (Alex K. Sangma) GAC-na dabimika dake Assam-o songdongenggipa A·chikrangna GDC-ko ra·chakaniara dal·bea gualani ong·a ine talatan baksa, iako batanggimin 2014-2015 bilsirangon Assam-ni skotong minister gitcham Pa Tarun Gogoi sagian on·ahachim, indiba Assam-ni A·chikrang GDC-ko ra·chake A·chik jatna maming namgniko ra·bana man·jawa ingipao ra·chakjaha ineba ua janapataha.
Unomiting, UGACMC-ni dilgiparangni Assam a·doko songdongenggipa A·chikrangko cha·boke GDC-ko ra·chakdilgipa Alex K. Sangma, Crossbell Marak aro Thengsil Sangma-maangni kamko namnikgijaniko mesokna, mijal salni tom·anio uamang sakgittamni bimangkoba tarie so·angjolaha ine GNC-ni dilgipa koborna u·iatdapaha.
