29.8 C
Tura
spot_img

GHADC election-ko April 9 tariko ong•atgen

Must read

SHILLONG, Jan 28: Garo Hills Autonomous District Council (GHADC)-ni election-ko re•baenggipa April jani 9 tariko ong•atna da•al bristibar salni bako Meghalaya Cabinet manchie donangaha. Ia election-ni result-ko April-ni 14 tariko parakatskagen.

Cabinet tom•a matchotani ja•mano kobor ra•timgiparangna u•iatengon, GHADC-ni election-na notification ba u•iataniko March 8 tariko on•anggen aro unsal dipetan Model Code of Conduct (MCC)-ba a•bachenganggen ine Meghalaya a•dokni Deputy Chief Minister Prestone Tynsong parakataha.

Gital dake chapa ka•taigipa draft electoral roll-rangko February 4 tarikon on•anggen aro maiba jegalani ba a•kanganirang donggenchimode uarangko February 18 ba una skangan tarina nanggen ine janapatengon, bon•kamgipa electoral roll-rangko March jani 6 tariko chapa ka•gen ine Tynsong parakataha.

An•tangtangni dilgiparangko seokchina gita March-ni 8 tariko dingtang dingtang constituency-rangna okamaniko on•gen aro nomination-rangko on•ani bon•kamgipa tarikara March 15 tarik attamni 3:00 bajina skang ong•gen. Nomination paper-rangko March 15 tariko nipilanggen aro nomination paper-rangko ra•pilani bon•kamgipa tarikara March jani 19 tarik ong•skagen.

Election-o susana man•enggipa candidate-rangko March 22 tariko parakgen aro apsan salon candidate-rangna symbol ba chinrangko sualatgen.

GHADC-na dongimin term re•anggipa 2020 bilsini October 18 tarikon bon•ahachim indiba sabisirang giproroahani a•sel election-ko dontongate Administrative Rule-ko ra•gatskana nangahachim.

spot_img

More articles

spot_img
-->

Latest article