Tura, Feb 2: Garo Hills Autonomous District Council (GHADC)-o kam ka•enggipa manderang bilsigni batpile an•tangtangni dormaharangko man•tokkujaengani gimin da•o re•baenggipa April jani 9 tariko ong•atna tik ka•gimin GHADC election-na skang ia dormaharangko on•jagenchimode ia election-o dilgiparangko seokanio bakko ra•pajawa ine GHADC-ni Non-Gazetted Employees Association (NGEA) parakataha.
GHADC election-ko re•baenggipa April jani 9 tariko ong•atna gita a•dok sorkari, adita salrangna skangsan manchie donangahachim indiba GHADC-o kam ka•enggipa manderang bilsigni batpile an•tangtangni dormaharangko man•tokkujaengani gimin ia election-o bakko ra•jana gita manchiangskaaha.
Kobor on•timgiparangni u•iatani gitade, re•anggipa December jao on•na ku•rachakgipa jagnini dormahakoba GHADC-o kam ka•enggipa bang•a manderangan man•tokkujaengachim.
GHADC-o kam ka•enggipa manderangna jagnini dormahako December jani gisepon on•na ku•rachakahaoba Krismas aro Bilsi Gitalna skang on•na man•jahachim indiba GHADC-o kam ka•enggipa mitam manderangde ia dormaharangko January jani gisepon man•tokskaahachim.
“GHADC-o iandake kam ka•ani bewalrang aro tangka paisarangko koros ka•anirang skatang ong•engani a•selan chinga indita jani dormaharangko da•onan man•tokkujaenga. Uni gimin chinga ia changode dilgiparangko seokanio bak ra•pajana gita tik ka•aha,” ine NGEA-ni dilgiparang parakataha.
