Tura, Feb 24: A·doko sorkariko rikdilenggipa NPP dol, re·baenggipa GHADC-ni eleksinna ru·uta somoirangoni dolni dilgipa ong·baenggipa aro MDC gitcham Pa Semford B Sangma-ko a·jani niksengbatgipa Tura seat-na seoke gimik sak 16 candidate-rangni skanggipa bimingrangko Butbar salo parakataha.

NPP dolni bimingrangko Butbar pringo parakatanio, Garo Hills a·jani district dambongao susaatna tarienggipa bimingrangko minge parakatgipao da·o GHADC-ni Chairman ong·enggipa aro CEM gitcham Pa Denang T Sangma-ko Rongrenggre (Williamnagar) seat-na seokpiltaie susaatnasienga. Elakao ua changgnina kingking susae chebaaha.

Bimingrangko parakatgipao da·o MDC ong·enggipa sak-chet baksana Raksamgre-ni MLA, Pa Benedic Marak-koba man·chapataha.

Da·o MDC ong·enggipaoni biming donggiparangara – Rongrikkimgre-na Wenison Ch Marak, Raksamgre-na Benedic R Marak, Naguapara-na Dhormonath Ch Sangma, Rongrong-na Sukharam K Sangma, Damas-na Dolly K Sangma, Samandagre-na Brilliant R Sangma aro Williamnagar-na Denang T Sangma.

Susanasienggipa sakgipin candidate-rangara – Siju-na Albinush R Mara, Silkigre-na Sengbath R Marak, Gasuapara-na Sengchim N Sangma, Tura-na Semford B Sangma, Dengnakpara-na Sanjip T Sangma, Nogorpara-na Linekar K Sangma, Darugre-na Henen R Sangma aro Jengjal-na Grahambell A Sangma.