Ghaziabad, May 24: India a·songo COVID-19 giproroan baksana Black & White Fungus sabisi nakatanichi manderang kenjagokataniko man·tokengon, da·o Ghaziabad songjinmao skanggipa changna Yellow Fungus-koba man·gipa dongaha ine kobor on·aha.
ENT Specialist BP Tyagi-ni parakatani gitade, uni hospital-o mande saksa Yellow Fungus-ko man·e sannaniko ra·enga.
Ghaziabad-ni Harsh Hospital-o Sanjay Nagar-oni bilsi 45 ong·gipa mande saksa, black & white fungus baksana yellow fungus-ko man·e sannaniko ra·enga ine Dr Tyagi parakataha.
Principal Professor Tyagi-ni parakatani gitade, iandake be·eno rimite nagipa sabisiara nampilna gita ru·ute somoiko nangronga aro iana uamang Amphotericin B bijiko su·enga.
Sabisini chinrangni bidingo talataniko on·angengon, ia sabisiko man·on mandeni be·en namen neng·na a·bachenga aro ua mande cha·na ringna sikjae uni be·enni jriani komiangna a·bachenga ine Prof Tyagi parakataha.
“Rongtal an·talani dongjanichi mande ia sabisiko man·rongbata, uni gimin ia sabisiko chel·chakna gitade mande rongtal an·tale dongna nangchongmota,” ine Prof Tyagi parakataha.
