Shillong, Aug 20: Meghalaya aro Assam a·dok damgnini sima-arirango golmal gnanggipa biaprangni gimin che·em-che·em poraie nie uni chu·gimik report-rangko sokatchina gita sorkari, dolgittam committee-rangko songangaha ine a·dokni skotong minister Pa Conrad K. Sangma, Sukrobaro u·iataha.
A·jani gipin sakgittam MLA-rang baksana Deputy Commissioner-ko member secretary done, a·dokni dakchakgipa skotong minister Pa Prestone Tynsong-chi Ri-Bhoi district-ni committee-ko dilanggen. Ia committee-an district-ni ning·o kajia-golmal gnanggipa simarangko niange uni report-rangko sokatgen ine Pa Sangma u·iataha.
Apsandaken, district-ni MLA-rangko aro DC-ko man·chapate, West Khasi Hills-o Cabinet Minister Pa Renikton Lyngdoh-chi committee-ko dilanggen. East Jaintia Hills-o Cabinet Minister Pa Snaiwbhalang Dhar, committee-ko Home Minister Pa Lahkmen Rymbui baksana sakgni gipin MLA-rang aro DC-chi dilanggen ineba skotong minister u·iatkuaha.
Skotong minister-ni u·iatani gita, Assam a·dokba apsandakgipa committee-kon songangaha aro da·o kamrangkoba a·bachengatengaha, indake jensomoio uni report-rang sokbahaon dolgnichinin apsan re·ange nieaniko dakgen aro a·dok damgnini sorkarirang changsa gronge agangriktaigen.
