Shillong, Dec 9: Meghalaya a•doko ra•gatchina dabienggipa Inner Line Permit (ILP) aro Meghalaya Residents Safety & Security (Amendment) Act (MRSSA)-ni bidingo Union Minister Amit Shah aro gipin dilgiparang baksa agangrikna gita a•dokni Governor Satya Pal Malik, December 17 tarikni ja•man New Delhi-ona re•anggen ine Budbar attamo, Meghalaya a•dokni Chief Minister Conrad Sangma parakataha.
“Meghalaya a•dokni Governor, iarangni bidingo Home Affairs Ministry baksa an•tangni gadango agangrikegen. Apsan somoion a•dok sorkarikoba iarangni bidingo agangrikchina Governor ge•etaha. Chinga bebera•a kamrang chu•sokgipa ong•anggen,” ine Sangma, a•dokni Governor-ko grongeani ja•mano kobor ra•timgiparangna parakataha.
Meghalaya sorkarini dilgiparangba ILP-ni bidingo a•songni Prime Minister Narendra Modi-ko grongegenma ine sing•on, iani bidingo a•dokni Governor, an•tangan agangrikchengna siengani gimin uamang senge nikuna nanggen ine Chief Minister parakataha.
