Shillong, Feb 17: ILP-ni mamla a·doko da·omiting namen ding·chaoengani gisepo, Meghalaya-o Inner Line Permit (ILP)ko ra·gate on·ani giminan a·dok sorkari, ma·mong baksa agangrikenga ine a·dokni skotong minister Pa Conrad K. Sangma mijalo agan-talataha.
Ian maikoba da·o bi·a, da·on man·aigipa ong·ja aro iani gimin agangrikaniko dakenga ine skotong ministerni mijalo Shillong-o koborna agananganio, a·dok sorkari iako chanchiaona ra·baaha aro jinmaan iako assembly-o ra·chakange gimikan iana gisiko nangtokenganiko mesokaha. Iani bidingon chinga agangrikenga aro dondikgijan iako India sorkario mol·molenga aro agangrikaniko mikkangchiba dakangkugen, ine ua parakataha.
Ma·mong baksa ILP-ni bidingo agangrikenganiko somoi ra·dodapdapani gimin warachakgipa dol Congress-ni matnangenganiko jegalenba, ia mamlani gimin sorkari agangrikaniko dakangkuenga maina indakgiparango somoiko nangtelaia ine Pa Sangma talataha.
“Uko gronge a·dokni obostako unbaksa agangrikna chol ong·aha aro a·dokni mande sakantini agananirangkon songjinmaona uni re·baani somoio knatime ra·angnaba ua ku·rachakataha. Sakanti baksan cha·rim-ringrime iani gimin pilak baksan chanchirimjolgen ineba ua ka·dingjole janapataha, maina ian a·songni bidingo ong·ani gimin anga adita konta somoirangkode jakkalna man·aigen aro ian Meghalaya sorkarini bang·a chango janapenggipa chanchiani mamlaba ong·enga…,” ine Pa Sangma janapataha.
“A·doko songdongenggipa manderangni chagrongenggipa neng·nikanirangko aro maini gimin iana dingtang dake dabiani ong·enga uko knatime ra·angna gita ma·mongni home ministerni Shillong-ona re·baenba dingtang dingtang organisation-rang baksa asongrime iani bidingo agangrikna cholko ra·enganina anga namen kusi ong·a… Anga chanchia, unbaksa agangrikani ja·man mikkangchi iako namatna gita maiba cholkode man·telgen,” ineba skotong minister agandapataha.
