Shillong, July 22 : Central Agriculture University (CAU), Imphal, College of Community Science, Tura-ni gita India-ni Salgro Salaram jolo songdonggipa manderangni dakbewal rikbewal aro ma·gitcham pagitchamrangni ripingba·enggipa bosturangna National Buyer-Seller Meet cum Exhibition-ko re·baenggipa July jani 24 aro 25 tarikrango Shillong songjinmao donggipa State Convention Centre-o ong·atanggen. Ia tom·aniko ong·atanichi, India-ni Salgro Salaram jolo songdongkamgipa dingtang dingtang jatrangni tarigimin bosrurangko mesokna aro ra·dona gita manderangko apsan tom·atna dakchakgen.
“From Heritage to Enterprise : Empowering Women Artisans in Northeast India,” ine katta bichongko done ong·atna sienggipa ia tom·aniara, Salgro Salaram jolo donggipa sak 100-na bate jaktangchi dake rike cha·gipa me·chikrang, SHG-rang, FPO-rang aro chonchongipa bading chiwalaniko a·bachengatgipa dolrangko bregiparang, a·palchina bostu watgiparang aro ra·skae palgiparang baksa nangrimatna dakchakgen. Lakadong Turmeric, Chak-Hao Black Rice, Dalle Chilli, Adi Pong Rice Wine, ba·ra dokanirang, jaktangchi tarigipa bosturang baksana wa·a aro ray-oniko tarigipa bosturangko man·chape jolo songdonggipa manderangni tarigipa aro GI-tagged ka·ako man·gipa bosturangko iano mesoke on·anggen.
Ia program-ko ong·atanio, branding, packaging, digital marketing, sorkarini scheme-rang, tangka paisani gita dakchakaniko on·ani aro pangkamgipa karkanako namroro silroroatani bidingo technical session-rangkoba ong·atanggen. India-ni Salgro Salaram jolo donggipa manderangni tarigipa aro ripingba·eng·gipa bosturangko dal·bata bazar anti-ona sokatna gita PRIME Meghalaya, Agriculture and Horticulture Department, MSSDS, Directorate of Food Processing (DoFP) aro MBMA-rangba dakchakaniko on·enga.
