New Delhi, Jan 14: India a•songni mikkim rasongko pe•na miksongenggipa a•songrangna India a•songni sipairangba bilko mesokskana man•gen ine Bristibar salo, a•songni Defence Minister Rajnath Singh, China a•songna mikrakataniko on•angaha.
“Chingna dinggrikaniko nangja indiba je a•songrangan chingni mikkim rasongko pe•na miksonganirang donga, uandakgiparangnade chingni sipairangba bilko mesokskana man•aigen,” ine Armed Forces Veterans Day-ko maniani somoio, a•songni Defence Minister, China a•songko biming minggija aganaha.
“India a•songde darang baksaba dinggrikaniko nangnikja. Tom•tomani aro ripeng besa kaanian chingni an•chio donga aro chingni dakbewalba ong•ani gimin chingna tom•tomani aro meli nangrime donganikosa nanga,” ine Singh aganaha.
A•songni defence minister, Bengaluru songjinmani Indian Air Force Headquarter Training Command-o aganprakengachim.
Sipai dolrangna ma•mong sorkarini chamatgipa gong kror 48,000 tangkarangni gimin janapatengon, “HAL-oniko bol 83 LCA Tejas fighter jet-rangko ra•bana gita chinga ra•chakmanaha aro ian a•songo ge 50,000 kamrangko ong•katatna dakchakani ong•gen,” ine Singh parakataha.
Ladakh-ni sin•begipa aro ga•nanggijagipa biapo sipairang da•o jaskuna a•songko warachakengmiting somoio a•songni Defence minister ia kattarangko aganaha.
Dolgni army-rangni gisepo changchetna kingking gronge agangrikahachim aro da•o skugipa changna agangrikna siengoba tarikrangko tik ka•skakujaengachim.
India a•songni sipairang ka•dongani aro chakchikani gnang a•songko warachakenga ine janapatengon, sipairangni kamrangko toe agangenchimode India a•songo songdongenggipa mande sakantian rasong chagen ineba Defence Minister parakataha.
