Shillong, Sept 15: Meghalaya a·doko Inner Line Permit (ILP)-ko ra·gatani gimin dabie a·dok sorkari, kinggni chittirangko aro ge·sa memorandum-ko Ministry of Home Affairs (MHS) na on·ataha ine skotong minister Pa Conrad K Sangma, Bristibar salo assembly-o u·iataha.
ILP-ni mamlako batanggimin 2019 bilsio Assembly tom·ao jinma namnike ra·chakangahani gimin iana da·o sorkarini kamrangko ka·atengani bidingo MLA Pa PT Sawkmie sing·angaha.
“ILP-ara a·doko songdongenggipa manderangni nangnikenggipa mingsa ong·a, maina ia mamlara bilsignina skangonin ong·a, jena dabianikon India sorkariko gisik ra·atpiltaia gita chanchirimaniko daktaiode namgen gita nika,” ine Pa Sawkmie janapatan baksa, India sorkariko gisik ra·attaia gita maidake Manipur a·dok uamangni assembly o changgittamna kingking iako ra·chakangahachim uko toenba aganangaha.
Iana skotong miniterni aganchakanio, ILP-na gisiko nanganiko mesoken uamang batanggimin somoio assembly-o ra·chakangaha ine talatan baksa, uni ja·manon ua India sorkari baksa agangrikaha aro changgnide Pa Amit Shah-naba chittiko seataha. Official-ni gita ong·gijaba changni chang agangrikna jotton ka.·aha indiba ian changni-chang agan-golpogrikna nanggnigipa kamsa ong·a, indimangba chinga man·adipet jottonde ka·enga. ILP-ko a·doko ra·gatna gisiko nanganiko mesoken iako assembly-o ra·chakatanian chingni da·alona namgipa ja·kuko de·ataniba ong·enga.
Indake ong·engon, ia mamlako India sorkari baksa agangrikaniko dakangkuna gita a·gipi minister aro a·gipi officialrangko songna man·ode nambatgen, ong·jaode, iana a·dokni sakgitttam MP-rangna bilko on·a ong·ode namgen ine Pa Sawkmie assembly-o agan-ku·pattianiko on·angaha.
