29.8 C
Tura
spot_img

Internet gita cha·bokanio, chanchichipgipa sakbongako Assam Police rim·a

Must read

Guwahati, Dec 6: Internet aro technology-ni ta·raken tang·dorikrikenganio, ong·gija kamko ka·giparangnaba ian mingsa bilakbegipa silchidare gita ong·skaienga. Iandakgipa ong·gija kamrangko ka·e online gita tangka-paisarangko alturiri dake bang·a manderangoniko sal·ope ra·enganio Kamrup district-ni Rangia police station-o minggni mamlarangko segatanggipao pangchake dos donggipa mongsong jaksikgipa sakbonga manderangko Assam Police mijal walo rim·aha.

“Kamrup police dol, mijal Sonibar walo Kampur aro Jamunamukh jolrangoniko tanggitik sandirokataniko dakanganio, Rangia police station-o IPC-ni section 420/379-ni ning·o segatgimin case number 895/20 aro IT Act-ni sections 66C/66D baksana IPC-ni section 420/379-ni ning·o segatanggimin case number 944/20-rango nangchape chanchichipgipa dos donggipa sakbonga jaksikgiparangko rim·aha,” ine Assam Police-ni da·al Robibar salo koborna seatchi u·iatgipao janapataha.

Ong·gija kamrangko ka·anio chanchichipe rim·ako man·gipa manderangko — Nagaon district-ni Kampur police station-ni ning·ogipa Padumani, Bakulguri songoni Fayaj Ahmed (bilsi 20), Syed Ahmed Laskar (bilsi 28), Guljar Ahmed Laskar (bilsi 30) aro Toimuj Ali Laskar (bilsi 26), aro Nagaon district-ni Jamunamukh police station-ni ning·ogipa Nagayapam songoni saksa Rashid Ahmed Barbhuyan (bilsi 29) iamang ine police ma·sina gita man·aha.

Rim·a man·gipa manderangoniko ge·sa HP Laptop, ge·sa Epson Printer, gari bolsa (Maruti Brezza), Tg 25,000, ge·sa rubber stamp, tol·gipa voter card-rang, tol·gipa PAN card-rang, ge·chet mobile handset-rang, ATM card-rang aro dosi on·ani lekkarang gimikko police ra·sekaha ine koborna u·iatdapaha.

spot_img

More articles

spot_img
-->

Latest article