Shillong, July 13: Meghalaya a•doko tika su•na chol man•enggipa mande pilakkon Meghalaya sorkari, da•o mikkang jagni jagittamni gisepon matchote su•na nisanko donenga.
“Tika su•na chol man•enggipa mande pilakkon da•o September bon•angachibara ba October a•bachengachibarade matchote su•na man•na gita an•ching salprako sak 20,000-oni sak 25,000-kode su•na nangengaha,” ine a•dokni Chief Minister Conrad K Sangma parakataha.
Mongolbar salo, salgro salaramni pilak chief minister-rang baksa a•songni Prime Minister Narendra Modi-ni video conference gita agangrikani somoio a•dokni Chief Minister Conrad K Sangma-ba dongpae bak ra•angahachim.
Meghalaya a•doko COVID-19 man•ani da•o 10 percent-na komibataha ine janapatengon, a•dokni damgni a•jarangosan da•o COVID man•ani 10 percent-na batengkua ine Chief Minister parakataha.
Tikarangko su•aninasan da•o a•doko jajrengna nangani ong•kuenga ine janapatengon, mitam case-rangode a•doko kam ka•anirang adita komiengkua indiba ia kamrangko nambatatna gita kamrangko ka•engaha ine Sangma parakataha.
“A•doko tika su•aniko nambatatna gita chinga MLA, MDC, dingtang dingtang toromni dilgiparang, Nokmarang aro dingtang dingtang dolrangkoba bakrime kamko ka•china gita mol•molataha,” ine Chief Minister aganaha.
“Batanggimin adita salrangni gisepo tika su•anio namdapanirangko nikna man•aha aro da•o mikkang antirango aro re•baenggipa jarangode tika su•ani tang•doangna ka•dongsoenga,” ineba Sangma aganaha.
Neng•nikanirangko chagrongna nangengmiting somoio dontonggija dakchakanirangko on•engani gimin ua, India sorkari aro Prime Minister-koba mittelpilangaha.
“Bilsi 18 batgimin manderang pilaknan India sorkari jaksrambee tikarangko indin on•ataha aro dingtang dingtang a•jarangna oxygen plant-rangkoba India sorkari dakchake on•ataha,” ine Chief Minister parakataha.
