New Delhi, July 13: Gittamgipa changna COVID-19-ni giprorotaianiko champengsona man•na gita salgro salaramni pilak a•dokrangon bilsi sokgimin manderangko matchote tika su•galgalchina gita a•songni Prime Minister Narendra Modi, salgro salaram a•dokrangni chief minister-rangko didiataha.
Mongolbar salo a•songni Prime Minister Narendra Modi, internet gita salgro salaramni chief minister-rang baksa agangrikangengon, salgro salaram a•dokrango COVID man•aniko komiatna gita ta•raken tikarangko su•china aro COVID-19-ko warachakna dongimin dingtang dingtang niamrangko ja•rikchina didianiko on•angaha.
Salgro salaram a•dokrango aro mongsongbate manderangni bazar anti cha•chakgipa biaprango manderang mask-rangko gangija aro saksa sakgipinoni chel•tanggrikgija tom•engani giminba Prime Minister, an•tangni jajrengchakaniko parakataha aro India a•songo da•o COVID man•ani komiangahaoba mikrake donganiko komiatkujachina gita salgro salaram a•dokrango songdongenggipa manderangko mol•molataha.
Coronavirus-ni rokomrangko name nirokna sandina nangenga ine janapatengon, jo•ongrang dingtang ong•ani ja•man maikai mandeko bilgriatna man•a, uko ma•sina gita health expert-rang am•sandienga indiba da•o dipetde chel•chakani aro sanna bananiko on•anian nangchongmotbatgipa ong•enga ine PM Modi aganaha.
India a•songo COVID-ko porikka ra•e nina aro sanna banani cholrangna sorkari gong kror 23,000-ko chame donmanaha aro salgro salaram a•dokrangba porikka ra•e niani kamrangna aro sanna banani kamrangna ia tangkarangonikon jakkalna man•gen ineba Prime Minister parakataha.
Ia internet gita tom•aniko ong•atanio Assam, Nagaland, Tripura, Sikkim, Manipur, Meghalaya, Arunachal Pradesh aro Mizoram a•dokni chief minister-rang bakko ra•angaha aro tom•anio Union Home Minister Amit Shah baksana Union Health Minister Mansukh Mandaviya-ba dongpae bakko ra•angaha.
