Shillong, May 28: State Reservation Policy-ko gital dake nipiltaichina dabie, Shillong songjinmani Additional Secretariat sambao okumu chake jingjengatenggipa Voice of the People’s Party (VPP)-ni president Ardent Miller Basaiawmoit-ko Robibar salo, Khasi Students Union (KSU)-ni dilgiparang grongeaha.
Reservation policy-ko nipiltaichina VPP-ni dabianio chakpaaniko parakatengon, obostarang namjabatangna skangan VPP-ni president-ko okamatenba, reservation policy-ko gital dake nipiltaiani bidingo agangrikchina gita KSU-ni president Lambokstarwell Marngar, a·dok sorkariko didiataha.
KSU-ni grongeani ja·man kobor ra·timgipa manderang baksa agangrikengon, Reservation Roster-ni bidingo chanchirimna gita a·dok sorkarini songe on·gipa committee-o VPP-de bakrimjawa maina a·bachengonin uamang reservation policy-ko gital dake nipiltaichinasa dabiengachim ine VPP-ni dilgipa Ricky Syngkon parakataha.
Reservation policy-ko gital dake nipiltaichenggija Roster-ni bidingo chanchirimna committee-ko songaniara orto dongja ineba Syngkon parakataha.
Roster system-ni bidingo adita salrangna skang, pilak political dolrangni tom·aniko ong·atani ja·man dingtangmancha chanchirimdilna gita committee-ko songe donangahachim aro ia committee-ko a·dokni Cabinet Minister Dr Mazel Ampareen Lyngdoh dilengachim ine nikna man·a. Ia committee-o VPP-koba man·chape dingtang dingtang political dolni dilgiparangkoba membor ong·china donatahachim.
