Tura, May 28: Garo Hills-o Garo National Liberation Army (GNLA) bobil dolko bikottaina tarienga ine social media-rango an·tangtangni noksarangko mesokatgipa mande sakgittamko police-rang rim·na man·aha.
Adita salrangna skang, Jingjang D Shira minggipa mandeko GNLA bobil dolni gital chief executive director ine a·kangatenba, sak 500 chadamberangko GNLA bobil dolo rimnape, West Khasi Hills a·jani Rengdim jolo training-ko on·enga ine Whatsapp gita watatako police-rang man·soahachim. Ia Whatsapp-o uamang, Jingjang D Shira ine a·kangenggipa mandeni noksa baksana GNLA-ni gital secretary aro second-in-charge ine a·kanggipa Nengsrang Sangma-ni noksakoba watataha.
Koborrangko man·soani ja·man police-rang, iani bidingo ning·tubate am·sandianirangko dakon, GNLA bobil dolko bikottaina jotton ka·enga ine a·kangenggipa manderangara, West Garo Hills a·jani Dalu police station-ni ning·o donggipa Darangagre songni bilsi 22 ong·gipa Namchang Ch Momin (Jingjang D Shira), Dalu police station-ni ning·o donggipa Ganipara songni bilsi 26 ong·gipa Adot M Sangma aro Dalu police station-ni ning·o donggipa Nalnapara songni bilsi 26 ong·gipa Silwit R Marak ong·a ine ma·sina man·aha.
Ia manderangni bidingo ma·sina man·ani ja·man, police-rang ia manderangko rim·na Darangagre songona re·angon, kosako janapgipa manderang sakgittaman Kherapara police outpost-ona re·ange an·tangtangko bame on·eaha ine koborko man·soaha. Uandaken Darangagre songona re·angenggipa police dol, Kherapara OP-ona re·bapilenba, ia mande sakgittamko sing·sandieaha.
Ja·mano police-rang, Namchang Ch Momin ba Jingjang D Shira-ni nokona re·ange am·sandianirangko dakon, uni nokoniko camouflage gandingrang, juttarang aro gipin bosturangko man·aha.
Ia manderang, bading chiwalgiparangko aro jolo songdongenggipa manderangko kenjagokate tangka paisarangko dabie ra·na gitasa GNLA bobil dolko bikottaienga ine jangbingbangatna jotton ka·ahachim ine West Garo Hills a·jani SP VS Rathore parakataha.
Iandake bobil dake chakatani bidingo saoba maiba koborrangko man·sogenchimode joltangtangni police station-na u·iatchina gitaba ua manderangko didiataha.
