Williamnagar, May 4: Williamnagar-ni Loyola College-o salgnina ong•atenggipa Loyola Fest 2026-ko Sombar salo, Traditional Day ine bimingko donenba, dingtang dingtang jatrangni daka rikani aro ku•mong nangrimaniko mesokanichi a•bachengataha.Ia Loyola Fest-ko a•bachengatanio, a•dokni Cabinet Minister aro jolni MLA Marcuise N Marak, mongsonggipa sokgipa ong•e bak ra•angaha aro unbaksana Williamnagar District Sports Association-ni President Sengbath R Marak-ba Guest of Honour ong•e bak ra•angaha. Ia Loyola Fest-ko a•bachengatanio, gitcham MLA Francis Pondit R Sangma, East Zone ni Garo Students Union (GSU)-ni dilgiparang, ma•a paarang, chatro chatrirang aro jolo songdongenggipa manderangba bak ra•angtokaha.

Ia program-ko Loyola College-ni chatro chatrirang, chong•motan Dimdimbe M Marak aro Dimrik Chuan R Marak sokachakenba dilangaha.Rimchaksoani kattarangko Loyola College-ni Principal Dr Fr Stephen Athikho aganangengon, ia tom•anio mongsonggipa ong•e sokgiparangna mande ra•pilskaaniko dakangenba, ia bilsini Loyola Fest-na donsogimin pangchakani, chong•motan ‘Echoes of the Hills, Unity in Diversity’-ni bidingo agan-talatanirangko on•angaha. Ia pangchakaniara, ku•cholsan ong•anian bil ine gisik ra•atani ong•a aro ia manianiara, chatro chatrirangna an•tangtangni changa sapanirangko mesokna, ku•mong nangrimaniko mesokna aro namgipa bewalo dal•rorona chol ong•a ineba Fr Athikho aganaha.Cultural program-ko ong•atanio, college-ni chatro chatrirang, salgro salaram jolrango donggipa dingtang dingtang jatrangni ganding chindingrangko gane, chrok mesaanirangko aro gitrangko ring•anichi manderangko an•saoatangaha. B.Sc Department-o poraienggipa chatro chatrirang, Khasi chrokaniko mesokangaha, Education Department-o poraienggipa chatro chatrirang, Wangala chrokaniko mesokangskaaha, Sociology Department Atong chrokaniko, Garo Department Mizo chrokaniko, English Department Naga chrokaniko, Political Science Department Jaintia chrokaniko, History Department Nepali chrokaniko aro Economic Department-ni chatro chatrirang, Bihu chrokaniko mesokangskaaha.

Ia program-ko ong•atanio Guest of Honour ong•e bak ra•anggipa Sengbath R Marak, jinmana aganprakangengon, ia Loyola Fest-o dongpae bak ra•pana man•ahani gimin an•tangni kusi ong•aniko parakangenba, ia program-ona okamatahani gimin college-ko mittelpilangaha. Lekka poraniara, ki•tap aro classroom-mangmango poraianikosan miksonga ong•ja indiba changa sapani, jatni daka rikani aro ku•cholsan ong•aniko mesokanio bak ra•anikoba man•chapa ineba Marak aganaha.Ia tom•anio, mongsonggipa ong•e sokgipa, a•dokni Cabinet Minister aro Williamnagar-ni MLA Marcuise N Marak-ba jinmana aganprakangengon, ia salni bako ua saksa MLA ba Minister ong•e uamangni mikkango chadengenga ong•ja indiba skango, uamang gita apsan daken mande ong•pana jumang nikani donggipa chatro gitasa chadengenga ine aganaha.

Ia sal somoirango chatro chatrirang, skia pora donggipamangmangsan ong•aija indiba jatni daka rikani aro an•tangtangni ja•dilrangko u•i-ma•sigiparangba ong•a ine janapatengon, ta•raken dingtangroroenggipa a•gilsako pangnan iandakgipa gunrangko rakkichina ua, chatro chatrirangko ku•pattiangaha.

Chief Minister Conrad K Sangma-ni dilanichi a•dok sorkari, namroro silroroanikosan ra•bana kamko ka•enga ong•ja indiba manderangni jat aro daka rikanikoba ripingna gita kamko ka•enga ine janapatengon, Meghalaya a•dokko man•chengaoni bilsi 54-ni ja•man Garo aro Khasi ku•sikkoba Official Language dake ra•chakaniara a•dokna dal•begipa chu•sokani ong•e, ian jatko mangrakbatatani aro sorkarini kamrangko manderangona sepangbatataniba ong•aha ine Marak parakataha.

A•song chigako rikanio chadamberangni daitorangko janapangengon, darang sorkari ba dilgipaba chong•mot dingtanganikode ra•bana man•jawa maina dingtanganide manderang an•tangtangonisa a•bachenga ine Minister aganaha.

Lekka porako an•tangtangni janggi tangani cholmangmangnasan skie ra•aijachina indiba songsalo dingtanganiko ra•bana gita mingsa kol dake ra•chinaba ua chatro chatrirangko didiangaha.Cultural program matchotani ja•man, program-ona re•bagiparang, Food Festival-koba niangaha aro iano chatro chatrirangni tarisogipa dingtang dingtang cha•ani ringanirangko cha•e ringe nina cholko man•aha.