Imphal, May 28: Re·anggipa May-ni 3 tariko, Manipur a·doko dingtang dingtang jatrangni gisepo so·sojengjeng ong·na a·bachengaoni bobil dake chakatgipa dingtang dingtang dolrangoni gimik sak 33-na baten police-rang so·ote galna man·aha ine Robibar salo, Manipur a·dokni Chief Minister N. Biren Singh parakataha.
Robibar salo, Army-ni Chief General Manoj Pande baksa tom·ani ja·man kobor ra·timgipa manderang baksa agangrikengon, chel·chakenggipa sipai dolrang, Manipur a·dokni dingtang dingtang a·jarango ramram manderangko chadrapengani gimin bobil dake chakatenggipa manderangko sandienba so·ote galna man·aha ine Singh parakataha.
Manipur a·doko bobil dake chakatenggipa manderang, dam rakgipa silchidarerangchi manderangko so·ote galna jotton ka·engachim indiba sipai dolrang uamangko warachakanio, bobil dake chakatenggipa manderangoni komibeoba sak 33-kode so·ote galna man·aha ine Manipur CM parakataha.
Singh-ni parakatani gitade, bobil dake chakatgipa manderangoni mitamkode police-rang rim·naba man·aha.
“Ramram manderangko kragija dake so·ote galna jotton ka·engani gimin chinga bobil dake chakatgipa dolrangni kamko raken jegalenga,” ine Singh parakataha.
Indake ong·engon, Robibar salo, Imphal West a·jani Uripok-o donggipa BJP-ni MLA K Raghumani Singh-ni nok aro uni gari bolgniko, manderang jinma chadrape so·e galaha ineba koborko on·aha.
Silchidare ra·bitgipa Kuki dolrangni kosako rakgipa ja·kurangko de·china dabienggipa manderang, BJP MLA-ni nok aro garirangko chadrapaha ine kobor on·aha.
