25 C
Tura

MCCL-ko tangatpiltaina gong kr 180-ko nanggen: Shylla

Must read

Shillong, Dec 10: Mawmluh aro Sohra-o songdongenggipa manderangni rongdik ine mingsing minggamgipa Mawmluh Cherra Cement Limited (MCCL)-ko tangatpiltaina gita komibeoba gong kror 180-ko sorkari koros ka•na nanggnok ine MCCL-ni Chairman Wailadmiki Shylla parakataha.

Iani bidingo kobor ra•timgiparang baksa agangrikengon, ia sal somoirango a•doko aro a•song gimikon tangka paisani gita neng•nikanirangko chagrongna nangengani gimin gong kror 180-kode sorkari koros ka•na man•jawa ine Bristibar salo, Shylla parakataha.
“Chinga pilakkon jotton ka•e niahachim indiba gong kror 180 tangkarangde chingo dongja. Ian Meghalaya a•dokosan ong•enga ong•ja indiba a•gilsak gimikon ong•enga,” ine MCCL-ni chairman aganaha.

Ia cement karkanako chalaianio man•enggipa neng•nikanirangko Industries department-ni am•sandianio ia cement karkanako tangatpiltaina gita gong kror 180 tangkarangko nanggen ine ma•sina man•aha.

“Survey-ko ka•ani ja•man ia karkanana bang•bea tangka paisarangko nanggnok ine ma•sina man•aha. Ia karkanachi tangka paisarangko man•dapna aro karkanako name chalaina gita chinga gong kror 180 tangkarangko nangenga,” ine Shylla aganaha.
Shylla-ni u•iatani gitade, ia cement karkanako chalaina gita sorkari, gong kror 324 tangkarangko 2006 bilsioni 2020 bilsiona koros ka•ahachim.

Ia cement karkanako ‘dry process’-ona apjitangani ja•man ia karkana dingtang dingtang neng•nikanirangko chagrongna nangaha aro cement-rangko tarianioba nangchakeaniko man•aha.

Ia karkanako ‘dry process’-ona apjitangani ja•man japrako metric ton 15,000 cement-kode tarina man•na nangachim indiba japrako metric ton 1000-ba gapjaha ine MCCL-ni chairman parakataha.

Da•o sorkari ia karkanana gong kror 180-ko koros ka•ani, joint venture-chi chalaiani ba karkanako chu•gimik chipani chol minggittamsan dongaiaha ineba Shylla parakataha.
Indake ong•engon, MCCL-o kam ka•enggiparangna ia December jani gisepon uamangni man•na nangenggipa tangka paisarangko on•na gita a•dokni Chief Minister Conrad Sangma ku•rachakahani gimin Mawmluh Cherra Employees Union-ni okumu chake jingjengataniko ra•galataha ine u•iataha.

More articles

-->
-->

Latest article