Shillong, July 16: Sukrobar salo Meghalaya a·dokni Chief Minister Conrad K Sangma, Meghalaya Democratic Alliance (MDA)-o bak ong·paenggipa dingtang dingtang political dolrangni tom·aniko ong·atangaha.

Tom·a matchotani ja·mano a·dokni Chief Minister, kobor ra·timgiparangna talataniko on·angengon, ia tom·anio a·dokni nangchongmotgipa dingtang dingtang kamrang, jekai Assam a·dok baksa sima ari jolrango meligrikna man·gijani, Inner Line Permit (ILP) aro Amit Shah-ni a·dokona re·bana sienggipani bidingo chanchirimangaha ine parakataha.

Union Home Minister Amit Shah, da·o re·baenggipa July 24 tariko Meghalaya a·dokona re·bana siengachim.

A·dokni Power Minister James K Sangma-ko ra·galchina dabienggipani bidingo janapatengon, MeECL-o tangka paisarangko kragija dake jakkala ine matnangenggipani bidingo jakgitele am·sandina gita committee-ko songaha aro iani bidingo MDA-o bakrimenggipa dolrangna u·iataha ine Chief Minister parakataha.

Sonibar salo ua Assam-ni Chief Minister Himanta Biswa Sarma-ko Guwahati-o gronge, Assam aro Meghalaya a·dokni simarango meligrikna man·jaenggipani bidingo agangrikna gita tarikrangko tik ka·angjolgen ineba Chief Minister Conrad Sangma parakataha.

Sangma-ni aganani gitade, ru·uta bilsirangonin Assam aro Meghalaya a·dokni simarango meligrikna man·gijagipa kamrangko namatchipna man·kujaengani gimin iana pangkamgipa cholko sandie kamko ka·na sorkari ja·ku de·chakataha.

Ia kamo pilak political dolrangko, songsalni dingtang dingtang dolrangko, nokmarangko aro gipin nangchongmotgipa dolrangkoba bak man·atpagen ineba Chief Minister parakataha.