Shillong, Jan 21: Da•al January-ni 21 tariko Meghalaya a•doko songdongenggiparang, chang 49-gipa Meghalaya Day-ko manitokengon, a•songni President Ram Nath Kovind aro Prime Minister Narendra Modi-ba Meghalaya a•dokni manderangna an•tangtangni namgipa skaniko on•ataha.
1972 bilsini January 21 tariko Meghalaya a•dok baksana salgro salaram jolni Manipur aro Tripura a•dokrangba, North Eastern Areas (Re-Organisation) Act 1971-ni ning•o a•dok songako man•ahachim.
Uandaken ia salo a•songni President aro Prime Minister, ia a•dok damgittamo songdongenggipa manderangna an•tangtangni namgipa skaniko on•angaha.
“A•dokko man•ani salo anga Meghalaya, Manipur aro Tripura a•dokni manderangna angni namgipa salamko on•chengna kusi ong•a. Ia a•dokrangara ong•telaigipa nitoanirangchi aro jatni dakani rikanirangchi pattianiko man•gipa a•dokrang ong•a. Mikkangchi ia a•dokrangni namroro silroroanina re•mikkanganio anga uamangna an•tangni namgipa skaniko on•atenga,” ine India a•songni President Ram Nath Kovind, social media-o parakataha.
Apsan daken, a•songni Prime Minister Narendra Modi-ba, chang 49-gipa Meghalaya Day-ko manianio a•doko songdongenggipa manderangna an•tangni namgipa skaniko parakataha.
“A•dokko man•ani salo anga Meghalaya a•doko songdongenggipa angni jong-ada, no-abi sakantinan an•tangni namgipa skaniko on•na kusi ong•a. Meghalaya a•dokko ka•sae dakanina aro meli-nangrime donganina mingsing minggama aro Meghalaya a•dokni chadamberang dingtang dingtang kamrango changgipa sapgiparang ong•a. Mikkangchiba ia a•dok chubata gadango namroro silroroangkuchina,” ine a•songni Prime Minister Narendra Modi parakataha.
Apsan daken, Manipur aro Tripura a•dokni manderangnaba ua an•tangni namgipa skaniko on•ataha.
