Shillong, Dec 7: Meghalaya Pradesh Congress Committee (MPCC) ni Presidentna ru·utgijan eleksin ong·na am·enga ine agananirang ong·katengon a·dok Congress dilgiparang Presidentko seokanio manderangni nikaiani gita altuani ong·ja aro dingtang dingtang dongimin niamrang donga ine aganskaaha.
Ia ja bon·on da·o ong·enggipa MPCC President Dr. Celestine Lyngdoh ni somoi ba matchotengahaon ua biapona dolni dal·batgipa dilgiparang East Shillong elaka ni MLA Dr. Ampareen Lyngdoh, Nongthymmai MLA Pa. Charles Pyngrope aro da·o ong·enggipa dolni kam ka·enggipa president Pa. James S. Lyngdoh susaanaba donga ine kattarang naenga.
Sawa ia chubatgipa gadangona sokdogen ine sing·aninade Congress dolni district-rang, block-rang aro unit-rang ni jakosa aganchakani ong·gen.
Dolni Niam Bidikni gitade Presidentni eleksinnade block aro unit rangko taridapna nanga. Block aro Unitrang dolni dingtang dingtang kamrangna an·tangtangni delegaterangko MPCC ona watatgen aro ua watata man·giparangonin Presidentko seokanio bak ra·pagen.
President ni biapna susaapachina angni bimingko angni block pakwatatode anga maina krat cha·gen ? Ua kamna anga biming segatmangmangaina man·ja. Delegaterang angni bimingko minge unit rangba uko pakwatatna nanggen. Ia biapna susaaniara manderangni altuae chanchia gita ong·ja indiba dongimin niamrang donga jerangkon chu·sokatna nanga ine Salaram Shillong ni MLA Dr. M. Ampareen Lyngdoh The Northeast Today songbat segipana aganaha. Dolni Niam Bidik-ko namdapatgimin gita President de maming saloba politics ni a·bao ja·napgipa ong·na nangja maina saksa mande biap damsakosan a·kangna man·aia, “saksa mande na biap damsasan ong·na man·aia” Ia niamko ja·rikna man·ode dol na nambatgen indiba ua niamko chu·sokatna man·ama man·jawama ineba Dr. Ampareen aganaha.
Da·o dipetde anga seokako man·gipa MLA ong·enga, uni gimin doni nangani somoirango anga an·tangko altuae naljokatna man·jawa aro MLA ong·ani gimin haida badiaba kamrangko ka·aniode nangtinggrikani ong·naba donga, chinga Assemblyni Membor ong·an baksana Congress Legislature Party (CLP) nib a bak rengsi ong·paa. Anga President ong·gen inede chanchina man·jawa, indaka bewalo ia kam ka·ja. Namgipa pangchakani dongjawa ine anga an·tangde agangen. All India Congress Committee (AICC) ba an·tangaride chanchianirangko dakna man·jawa, da·o dipetde Congress Meghalayao warachakgipa dol sa ong·engani gimin kakket aro bebeo susaaniko ong·ato nambatgen ine anga an·tangde nika ineba Salaram Shillong ni MLA aganaha.
PCC ni kamo dongani somoiko nanganirangko nigrike dona, AICC ni ku·pretgimin gita President donga jekon sakgni kam ka·enggipa Presidentrang Lok Sabhani MP Pa. Vincent Pala aro James S. Lyngdoh dakchaka. Ia kamko ka·anio rakgipa niamrangchi tiktak dongimin somoi dongja indiba a·dokni eleksinni niamranggitan apsan ong·ata ineba aganaha.
Da·o ong·enggipa MPCC President Dr. Celestine Lyngdoh susaataijawaha ine koborrango naani bidingo aganengon. Dr. Ampareen uni bidingo chinga dingchiken chanchirimenga, an·tangni kamoni neng·takna chanchianirang dongode ta·raken susaaniko ong·atgen ong·jaode unit rangko taridapaniko senggen ine aganaha. Ia ja on eleksin ong·gen ine jangbingbangani rangna ua an·tangni u·ianiode uan ong·ja aro Congress dolo je obostarang ong·enga uan kusinisa ong·a maina je dakgipa obosta ong·ona uan manderangni namgninasa ong·bata ineba janapaha.
Indake ong·engon, Nongthymmai MLA Pa. Charles Pyngrope President ni kamko ka·na dongimin somoi ia jaaon bon·engahani gimin haida ia jaa ong·jaode January jaao eleksin ong·naba donga ine aganaha.
Chugipa gadangoni sawarang susaaenga ine sing·on Pa. Pyngrope uan chugipa gadang ine sing·ani ong·ja indiba Congress dolni Niam Bidikni gitade je mandeba dolo biming segate bak rengsiko ra·paengachim uamangoni je ba susaana gita biming segatna man·aigen. Chingo district, block aro unit rangni president rangni gisepo seokgimin delegate rang donga, uamangsa Presidentko seoka ineba aganaha.
President na susaapana biming segatgenma ine sing·anina Pa. Pyngrope Anga biming segatgenma ? Anga nang·na aganjawa inskaaha.
Congress dolo suakpilen dilgiparang donga, dilgipaan dongja ine dolni kosako jangatanirang manderangko jajaatasan ong·aia, Srkariko chinga rikjaengani gimin chinga bilgria ong·ja. Da·o ong·enggipa President dingtang dingtang neng·nikanirangchi an·tangko chu·gimik ong·srange dangdike on·na man·jahasan ong·aia indiba uko chinga maan ra·a. President ni jokjani somoio kam ka·nan chinga kam ka·enggipa president rangko seoka indiba iasan oe President ko nanga aro uko nanagani somoi sokaha ineba aganaha.
AICC-o bilgrianirangni bidingo sing·engon Pa. Pyngrope AICC-o maming bilgriani dongja maina bilak wa·sagipa dilgipa Ma. Sonia Gandhian donga. Angni nikaniode jolantion dilgiparangko atchiatani somoi ong·engaha aro obostarangni kri nanggenode gitalgipa dilgiparangko seoke kamona ra·baaniba ong·engaha indiba Congress dolode dilgiparang suakpilen donga ineba agandapaha
