Shillong, July 25: Sukrobar salo, Meghalaya a·dok sorkari songadamo bading chiwalaniko a·bachengatgiparangko ra·dona ming 13 Memorandums of Understanding (MoUs)-rangko nambatsranggipa technical aro research Institute baksa soi ka·angaha. Pradhan Mantri Janjatiya Vikas Mission (PMJVM)-ni ning·o Summit for Rural Empowerment-ko Shillong-ni State Convention Centre-o ong·atmiting somoio ia MoU-rangko soi ka·angan baksana ming 6 MoU-rangkoba ta·raken soi ka·na ka·dongsoenga ine official-rang u·iataha.
Ia MoU-rangko soi ka·ani miksonganiara, songadam jolo donggipa chonchongipa bading chiwalaniko dakgiparangna dal·rorona dakchakaniko on·a gital technology-rangko ra·bae, gital bosturangko tarina dakchakani baksana dal·bata anti cha·ram biaprango uamangni man·gimin bosturangko palna dakchakaniko on·anian ong·a. Iani mitam kamrango, anaros aro te·rik-rangoni ong·katgipa jabolrangko a·sal-rang aro bostarang tariani, pulrangoniko knio nongna jakkalgipa rongrangko tariani, samna jakkalgipa sambolrangoniko to bikotani baksana misi-rang, ta·milangrang aro ta·bilchu-rangoniko be·enna namgniko on·gipa cha·ani bosturang tarianiko man·chapa.
Agriculture Minister Ampareen Lyngdoh, ia PMJVM-ko dal·begipa aro namgipa dingtanganiko ra·bagipa ine aganengon, a·dokni dingtang dingtang gamchatgipa program-rang jekai CM Farm Plus scheme aro State Organic Farming Mission-ni bidingo aganangaha, jean da·o dipet 52,000 hectares a·arangko man·a aro iako 2028 bilsio lakh 1 hectares-ona bariatna miksongenga.
Sak 50,000 manderangna dakchakaniko on·a, ge 169 Vikas Divyangta Vikas Kendras (VDVKs)-rangko namnike ra·chakangani giminba ua u·iatangaha. VDVK ge·prakan, 60%-ni gita tribal me·chikrangko man·chape dol 15 self-help group-rangna dakchakaniko on·an baksana uamangni training-na, bosturangko breanina aro packing ba bostu-rangko name bil·anina gong lakh 15-ko on·e dakchakenga ineba ua aganangkuaha.
Meghalaya a·dok, samtangtango donggipa ong·telaigiparangna nangchakeako ra·bagijagipa aro darangnan namgniko on·gipa tangka man·ani cholrangko ra·bana ma·gitcham pagitchamrangni u·i-ma·sianiko chasong gitalni science baksa brinatenga ineba Lyngdoh aganangaha. Program-rang jekai Meghalaya Collective-rang jolo man·gipa bostu-rangko a·songni aro gipin a·songni bazar anti-rangona sokatna dakchakaniko on·enga ineba ua janapangkuaha.
Meghalaya Basin Management Agency (MBMA)-ni Dr. Vijay Kumar D, ia MoU-rangko soi ka·aniara uamangko a·songni dal·dalgipa institution-rang baksa nangdimatenba VDVKs-ko songadam-ni mangrakgipa aro baikamgipa bading chiwalanirangko dal·rorona dakchakaniko on·gen ineba ua aganangaha. 2018 bilsio PRIME Programme-oni ia kamrangko ka·baenga aro ian a·dokni gipin jotton ka·enggipa program-rang jekai MSRLS, FOCUS, cooperatives aro producer group-rang baksa apsana ineba ua aganangkuaha. Union Finance Minister Nirmala Sitharaman-ni, Meghalaya a·dokko India a·songko an·tangon ka·dongna man·gipa ong·atna nambegipa dakmesokani ong·a ine rasong on·anikoba ua janapataha.
Ia summit-ara maikai sorkari game ge·e cha·giparangna, me·chik dolrangna aro songo donggipa manderangna dakchakaniko on·engachim uko mesoka ine Skotong Minister Conrad K Sangma aganangaha. Batanggimin bilsi 7-ni gisepo, lakh 5 mangni gita me·chikrangchi ge 55,000 self-help group-rangkoba kulia baksana lakh 2 mangni gita game ge·e cha·giparang aro ge 20,000 producer group-rang sorkarini dakchakaniko man·enga ineba u·iatangkuaha.
Uasan ong·aigija, CM Farm Plus scheme-ni a·sel bitchil sualanio ru·utanichi man·enggipa neng·nikanirangko namatna dakchakenga ineba ua janapataha. Iani gisepon, CM Assure Program, jeon a·dok sorkari ja 8-ni gisepon sal·warang aro gue-rangni damrangko rakkina gita kror 50 tangkarangko koros ka·anikoba ua japangaha.
Na·simang iakoba nina man·gen:
Na·simang iakoba poraina man·gen: Nongpoh-o sal ding·krakani somoio Traffic Police-rang chakchikbee kamtangko ka·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
