Shillong, July 19: Meghalaya a•dokni chadamberangna an•tangtangni changa sapani aro u•i-ma•sianirangchi janggi tangani cholrangko on•na gita tarigimin Meghalaya Youth Policy 2021-ko Sombar salo, Meghalaya a•dokni Cabinet ra•chakangaha.
Ia policy ba niamrangko sorkari bakan jinmana u•iatgnok.
Bilsi 10-ni gisepon Meghalaya a•dokkoba GSDP per capita aro SDG ranking-o nambatsranggipa dam 10 a•dokrangoni damsa ong•atna sorkarini nikjumanganio ia niamrangko Meghalaya sorkarini Sports & Youth Affairs Department seahachim.
Ia Youth Policy-ara, a•dokni chadamberangko lekka poranio, an•seng baljokanio, agan-ku•pattie on•anio, kamrangko ka•e cha•anio aro bading chiwalanio, kal•susaanio, jatni dakbewal rikbewal aro jakni kamrango, dingtang dingtang kamrango bak ra•paanio aro dilgipa ong•anio, samtangtango ong•telaigiparangna simsak nirokanio kamrangko namdapatna miksonge tarigimin policy ba niamrang ong•achim.
Ia policy-ni gimin a•dokni Chief Minister Conrad Sangma talataniko on•angengon, ia sal somoirango India a•songo chadamberangsa pilak kamrangkon jako ra•engahani gimin Meghalaya a•dokoba pilak chadambe me•a aro me•chikrangna apsan cholrangko on•e a•doko namroro silroroaniko ra•bana gita Meghalaya sorkari ia Youth Policy-ko a•bachengatenga ine parakataha.
Ia Youth Policy-ni bidingo a•dokni Sports & Youth Affairs Minister Banteidor Lyngdoh-ba talataniko on•angengon, ia Meghalaya Youth Policy 2021-ara chadamberangni dingtang dingtang kamrango chagrongna nangenggipa neng•nikani aro ra•bianirangko chel•chakna Meghalaya sorkarini ra•gatenggipa niamrang ong•a ine parakataha.
