Shillong, July 19: Sombar salo Meghalaya Cabinet, Meghalaya Public Private Partnership (PPP) Policy 2021-ko ra•chakangaha.
Da•o dipet India a•songo PPP policy dongkugijagipa damgittam a•dokrangoni Meghalaya a•dokba damsa ong•kuengachim.
Cabinet tom•a matchotani ja•mano kobor ra•timgiparangna parakatengon, Meghalaya a•dokoba private company-rangna sorkarini kamrango invest ka•ani cholrangko on•na gita ia PPP policy-ko nangchongmotenga ine a•dokni Chief Minister Conrad K Sangma parakataha.
Meghalaya a•dokni PPP policy-o mingsa dingtanggipa chol donga ine janapatengon, PPP policy-rangara bang•bata changon dal•dalgipa project-rangsa ong•ani gimin a•dok sorkari, Community Public Private Partnership (CPPP) policy-ko ra•gatskaaha ine Chief Minister parakataha.
“Iandakgipa niamrang a•songni gipin a•dokrangonaba dongengnaba gnang indiba an•chingni a•dokba ia CPPP policy-ko ra•gatgipa a•dokrangoni damsa ong•pagnok,” ine Sangma aganaha.
Chief Minister-ni talate on•ani gitade ia CPPP policy-ni ning•o badiaba song ba gittimrang, tourism, agriculture, horticulture, veterinary ba uandakgipa kamrangna private company-rangni on•gilaniko nangnikenga ong•ode ia policy-ni ning•o iandakgipa project-rangko ra•na man•gen.
Land Transfer Act-ni niamrangde PPP policy-osan nangchakeani dongaigen ineba Chief Minister talatangaha.
“Uni gimin ia policy-ko ra•gatanio a•a nokgiparangni aro joltango songdongenggipa manderangna naljokaniko on•anikoba nichengesa ra•gataha,” ine Sangma parakataha.
