Aizawl, Nov 15: Mija Sombar salo Mizoram, Hnahthial district-ni Maudarh-o donggipa ABCI Infrastructure Pvt. Ltd.-ni chalaienggipa ro·ong bikotgipa biapo a·sel-obosta ong·anio, sandiatgipa dolrang Mongolbar salo sak 8 manderangni manggisiko man·aha ine koboroniko knasona gita man·aha.
Official-rangni aganani gitade, Mongolbar pring 8 bajimango sakchet manderangni manggisiko ra·ongkataha, indake ong·oba sakgittamniko bimangkosan man·aiahani gimin uamangko da·odipet ma·sina man·kujaenga, unbaksana ro·ong bikotgipa biapo kam ka·enggipa sak 12 manderangba gimaengkua ine parakataha.
Ia a·selara mija November 14 tarikni attamchibara 2:40 bajimango ong·ahachim, uandake a·selo, ge 5 excavator-rang, bolsa ro·ong jetgipa aro ge·sa drilling machine-ba gimik sak 10 oni sak 15 kam ka·enggiparang baksa ning·ao dapchapako man·tokaha ineba u·iataha.
Attamchibara a·sel ong·ako kobor man·a tapan, Executive Magistrate sakgni, Dr. Lalramdintluanga, SDC, aro Betty Lalrinfeli, SDC- maang baksana medical team, ambulance aro naljokataniko on·gipa garirang baksa bakan a·damona re·angaha aro sandiatanirangko dakatengkua ine a·jani DC kobona agan-talataha.
