Shillong, Jan 7: Meghalaya a•dokni bilsi 50 gapaniko donsogimin somoi gitan maniangaigen ine Sukrobar salo, Meghalaya a•dokni Deputy Chief Minister Prestone Tynsong parakataha.
Iani bidingo kobor ra•timgiparangna u•iataniko on•angengon, a•doko sajinmarang donggenchimoba a•bachengo manchisogimin gitan a•dokni bilsi 50 gapaniko maniangaigen ine Deputy Chief Minister parakataha.
“Meghalaya a•dokni dingtang dingtang biaprango ong•atna sienggipa program-rangko ra•bachina gita sorkari, a•dokni Chief Secretary aro pilak deputy commissioner-rangkon u•iatahani gimin mikkang antipode chinga iani bidingo apsan asonge chanchirimtainaba gnang. Indiba chinga manianio bak ra•giparangkosa komiatna nangnaba gnang,” ine Tynsong aganaha.
Ia manianiko sorkari dontongatna man•jawa indiba program-rangko sorkari nipilangtaigen ineba Tynsong parakataha.
Meghalaya a•dokni bilsi 50 gapaniko re•baenggipa January 21 tariko dal•bee manina siengachim aro ia manianiona a•dokni Chief Minister Conrad K Sangma, a•songni Prime Minister Narendra Modi-koba okamatengachim.
