Shillong, July 29: Meghalaya a•dokni gitcham home minister RG Lyngdoh, Sukrobar salo a•gilsakko watangaha.
Uni siani koborko uni nokdangni manderang parakataha.
Batanggimin sal somoirangonin Lyngdoh sagi, saanirangko man•engachim aro adita salrangna skangsan uko Shillong songjinmao donggipa hospital-oni watpilahachim.
Uni saanirang namjabatroroahani gimin July 11 tariko, a•dokni gitcham home minister Robert G Lyngdoh-ko Bethany Hospital-ni intensive care unit (ICU)-o donatahachim.
Sianggipa RG Lyngdoh-ara, Meghalaya a•dokni gitcham minister Ampareen Lyngdoh-ni adagipa ong•achim aro ua gitcham MP aro Meghalaya a•dokni gitcham Speaker Peter G Marbaniang aro QE Lyngdoh-ni degipaba ong•achim.
Bilsi 14-na politics-ni kamrangko dontongchengani ja•man RG Lyngdoh, re•anggipa bilsio Congress dolona re•bapilenba, politics-ni kamrango bak ra•na a•bachengpiltaiahachim.
Indake ong•engon, uni sianina a•dokni Chief Minister Conrad K Sangma aro gipin dilgiparangba, an•tangtangni kalimpaaniko parakattokaha.
