Shillong, Feb 11: Meghalaya High Court-ni gital Chief Justice-na songako man·gipa Justice S Vaidyanathan, Robibar salo, an·tangni kamko jako ra·e ku·mikchetangaha.
Justice Vaidyanathan-ni ku·mikchetaniko, Meghalaya a·dokni Governor Phagu Chauhan dilangaha.

Ia ku·mikchetaniko Shillong songjinmani Raj Bhavan-o donggipa Durbar Hall-o dakangaha aro ku·mikchetanio a·dokni dingtang dingtang dilgiparang aro Meghalaya High Court-ni official-rangba dongpae bak ra·angtokaha.

Meghalaya High Court-ni gitcham Chief Justice Sanjib Banerjee, re·anggipa 2023 bilsini November jao, kamtangoni neng·takangahani gimin Justice Vaidyanathan, uni biapko ra·rikskaaha.

Iana skang, Justice Vaidyanathan, 2013 bilsini October ja intalan Madras High Court-o Judge ong·e kamko ka·ahachim.