Tura, Feb 23: Meghalaya a·doko rama jal·langrangko namdapatna aro sanna banani kamrangko namdapatna gita 15th Finance Commission, gong krorni kror tangkarangko chamataha ine Meghalaya a·dokni Chief Minister Conrad K Sangma parakataha.
East Garo Hills a·jani headquarter Williamnagar-o primary health centre (PHC)-ko kulie on·na aro Simsang chibimani paktangtango donggipa songrangko nangdimatna rama dilgniko tarina pangchakaniko songe on·na re·angani somoio ia kattarangko a·dokni Chief Minister parakataha.
Nengmandalgre-o gital rikgipa PHC-ko da·al Mongolbar salni bako a·dokni Chief Minister Conrad Sangma, nokdonggae on·angaha aro ia PHC-ko nokdonggae on·angani somoio Tura-ni MP Agatha K Sangma, Williamnagar-ni MLA Marcuise N Marak, Rongjeng-ni MLA Jim Sangma aro Williamnagar-ni MDC Denang Sangma-ba dongpae bak ra·angaha.
Ia Nengmandalgre PHC-ko gong kror 2.5-mang koros ong·e rikaha aro ia PHC-ko rikanichi Williamnagar jillani Simsang chibima nalsao songdongenggipa manderang namgnirangko man·pagnok.
Ia PHC baksana Nengmandalgre-oni Daribokgre km 35 ong·gipa rama aro Cherangre-oni Chisobibra-ona km 7.82 ong·gipa ramako tarina gitaba ia apsan biapon a·dokni Chief Minister, pangchakaniko songe on·angjolaha.
Ia tom·bimonganio a·dokni Chief Minister, jinmana aganprakangengon, a·doko songdongenggipa manderangni namgnina a·dok sorkari, dingtang dingtang rama tariani project-rangko jako ra·na man·aha aro ia project ba kamrangna ma·mong sorkari tangka paisarangko on·e dakchakaha ine parakataha.
Meghalaya a·dokna ma·mong sorkari, 15th Finance Commission-oniko gong kror 500 tangkarangko chame on·aha aro ia tangka paisarangchi a·doko sanna banani kamrangko namdapatna man·gnok ineba Chief Minister parakataha.
Chief Minister-ni parakatani gitade, World Bank-onikoba Meghalaya a·dokna gong kror 350 tangkarangko chame on·aha.
“15th Finance Commission-ni ku·pattianiko ra·chakahani gimin chinga India sorkariko mittelpilna ska,” ine Sangma aganaha.
