Williamnagar, Feb 23: Mija February 13 tariko bi·sa an·pakani somoio Williamnagar Civil Hospital (WCH)-ni staff nurse-rangni simsakgijanichi ga·akonata man·gipa bi·sa bakgitchakni sianganina nokdangni manderang baksa duk chakrimpaaniko mesokna Williamnagar jolni nangrimgimin NGO-rang, Februrary 24 tarik chong·motan Butbar salo kalimanggen ine koborna parakataha.
“Chinga sianggipa bi·sani nokdangna suk ong·chakjaha. Bi·sani janggiko gimaatanina chingni duk ong·aniko mesokna dingtang dingtang nangrimgimin NGO-rang, union-rang association-rang, a·gipi songdongkamgipa aro pilak manderang gisim ba·rarangko gane Budbar salo kalimaniko dakanggen,” ine GSU dilgipa u·iataha.
Hospitalrango bi·sa atchiataniko bariatna miksonge ma·giparangko hospital-o bi·sa an·pakchina okamaniara namgipa kam ong·achim, indiba jensalo hospital-ona re·bahaon ka·namgija kattarangko agane ka·saninggija jakkalanirangkosa bang·bata salon nikna man·a ine agane, doctor-rang aro nurse-rang ia kamko ka·na aro manderangna dangdike on·na miksongen skie ra·ahachim, indake kamtangko name ka·genchimode uan nitobeani aro dal·bea dakchakani ong·genchim ine GSU, Eastern Zone-ni padot Saljrang Tengrik R Marak koborna seachi janapataha.
Bang·a changon nurse-rang aro doctor-rangni ka·saninggija dake manderangko jakkalanirangko nikronga. Manderangna dangdike on·na sikjaode ia kamko jako ra·na nangja ine janapatenba, mikkangchi indake ong·taijana gita chu·gimik daitoko ra·e nirokatenggiparang simsakatna nanga aro simsakgijagipa staff-rangko kamoniko ra·galna nanga ineba NGO-rang dabiangaha.
Hospital-o bi·sa an·pakani somoio ka·namgija jakkalgenchimode, hospitalrango bi·sa atchiataniko maidake bariatna man·gen aro 100 percent-na miksonge kam ka·ani maidake chu·sokgen ine sing·doaniko dakan baksana, je kattako agana uko kamchi mesokna nanga aro mikkangchi indakgipa a·selrang ong·taijana gita mikrakataniko on·enba ia apsandakgipa a·selrang mikkangchi ong·taigenchimode, NGO-rang nidame dongchajawa ineba dilgiparang mikkrakatjolaha.
