Tura, Feb 23: Williamnagar, Loyola Higher Secondary School-ni Higher Secondary School Block-ko a·dokni skotong minister Pa Conrad Sangma, uni East Garo Hills District-china wenangmitingo nokdonggae on·angaha.

East Garo Hills a·jani poraigiparangna namen dakchakaniko on·enggipa niksenggipa poraichakram biap Williamnagar, Loyola Higher Secondary School-ni Higher Secondary School Block-ko nokdonggae on·na gita anga namen kusi ong·a ine skotong minister parakataha.

Tom·anio, CM’s Special Development Fund (CMSDF)ni ning·o chamgipa tangka-paisachi skulo rikatgipa Basketball court-koba Tura-ni MP Ma Agatha Sangma-chi oprake ong·angjolaha.

Garo Hills a·jao pass percentage-ko man·enggipani bidingo skotong minister an·tangni chanchianiko agananio, “Ian gimikni gitan skia-porani a·bako chalaianio mingsa neng·nikani ong·enga, uni giminsa sorkari, a·dokni chasong damberangni namgnina daitoko ra·an baksa manderang gimikni bakrime kam ka·na nanganiko mongsonge ra·enga. Ia ra·bianirangko an·ching ra·chake an·chingni bi·sarangko mikkangchi didiangna ine skotong minister ku·mongrimaniko on·angaha.

Unomiting, Samanda-ni St. George School-ni gital school bus-koba skotong minister-an a·bachengate on·angaha. Jinmana aganengon, “chel·a songrangoni ia skulo poraienggipa chatro-chatrirangni re·ruraanio ian namen dakchakaniko on·anggen ine agane, CM’s Special Development Fund (CMSDF) gita school bus-ko on·anichi poraienggipa chatro-chatrirangko uamangni skie ra·anio didianiko on·na schoolni jotton ka·ani baksa iachiba namgniko ong·angdapgen ine skotong minister aganaha.