Shillong, Dec 01: India a·songni gipin bakrango donggipa BSF sipairang baksa, Border Security Force (BSF)-ko a·songo songchenganiko gisik ra·e, sima-ari jolrango donge nitimenggipa Meghalaya-ni BSF sipairangba December 1 tarik, chong·motan, Bristibar salo chang 58-gipa Raising Day-ko maniangpaaha.
Janapjolna gita, skang India aro Pakistan dakgrikani ja·man a·songni sima-ari jolrangko chu·gimik aro bilake nitimatanirangko dakna nangchongmotaniko nikenba Padma Vibhushan award-ko chegipa IPS, K F Rustom Ji, BSF sipai dolko 1965 bilsini December 01 tariko songchengahachim.
Uandake, BSF sipairang, a·songni sima-ari Western Frontier-chipak 2725 km-rangko nitima baksana Eastern Frontier-chipak 4096 km sima-arirangkoba nitime a·songna chelchakaniko on·enga. Iana agreba, Line of Control (LoC), Counter insurgency, Anti Naxal operation ba ugita dakgipa kamrangchiba BSF sipairang a·songna chelchakaniko on·baenggipa ong·a.
A·bachengode, BSF-o 25 battalion-rangsan dongaiachim, indiba ru·utgijan ge 193 battalion-ona tang·doaha. Dangdike on·gipa sipai dolkosan baridapataigija, Air Wing, Water wing, Artillery iandakgiparangchi a·songna chu·gimik chelchak-nirokaniko on·ani kamrangoba namen bilakdapaniko nikna gita man·aha.
Unomiting, ia salko gisik ra·e manianganio, Meghalaya BSF-ni IG, Inderjit Singh Rana-ni jinmana aganprakatengon, songsul a·song Bangladesh baksa International sima-ariko sualgrike dongenggipa 444 km-rangko Meghalaya-ni BSF Frontier bilaken nitimanirangko dakatenga baksanaba, sima-arirango songdongenggipa Meghalaya-ni manderang baksa meli-nangrimaniko bilakbatatna gita manderangko ka·dongatani bidingo dingtang dingtang ja·kurangko de·a baksana public outreach programme-rangkoba ong·atrongenga ine parakataha.
Bilsisani gisepon, Meghalaya-ni BSF Frontier, niam gri palbadingenggipa gong kror 25-mangna bata bosturangkoba sekna gita man·aha, uarangoniara matchu, pekatgipa ringani bosturang, sona aro minggipin gamchata bosturangan ong·a janapatan baksana, niam gri napdrabagipa sak 61 India-ni manderang, sak 32 Bangladesh-oni aro sak 30 Rohingya-ni manderangko man·chape sima-arini niamko pe·gipa gimik sak 123 manderangkoba BSF-rang rim·na gita man·aha ineba IG janapatjolaha.
