Shillong, Nov 5: Meghalaya-ni sima arini batao donggipa biaprangna apsandake damrangko on·na Meghalaya Commercial Truck Owners and Drivers Assoctiation-ni (MCTODA) dabianiko chu·sokatna man·jawa ine a·dok sorkari parakatangaha.
Meghalaya a·dokni gisepo dingtangmancha tik ka·gimin damrang donggenchimoba, ia apsan damrangko gipin a·dokrang jekai Assam-o on·na man·jawa ine Budbar salo Deputy Chief Minister transport-ni in-charge Sniawbhalang Dhar kobor ra·timgiparangna parakatangaha.
MCTODA-ni cement aro uandakgiparangko salna dontongangkuna ine MCTODA-ni tik ka·ani ja·mano Dhar ia parakatanirangko dakangaha.
Association-ni manderang Meghalaya a·doko bosturangko salruraani damrangko jegalanirangko dakenga, maina Meghalaya a·dokni gisepo gong-9 on·gipako gipin a·dokrangode gong-5 on·e komibatanina ra·chakna man·gijani ong·a ine uamang janapaha.
Badiaba association-rang sorkari-ni tik ka·gimin damrangko cement karkana-ni nokgipa gamchina dabienga, aro iako uamang chu·sokatman·aha ine Dhar janapaha.
Dhar-ni aganani gitade, East Jaintia aro West Jaintia-o association dolgnirang cement karkana baksa melia kam ka·enba sorkari on·gimin damrangko ra·chakaha. Indiba Meghalaya-ni a·paloba apsan damrangko ra·china MCTODA dabienga aro gipin a·dokni ning·aosa ong·ani gimin iara ong·na amgijagipa ong·a ine ua aganangaha
Uandake Meghalaya-ni gisepo black top sorokrango km-prako metric ton-prako gong 11, rong·krek angipa sorokrango km-prako metric ton-prako gong-12 aro kutcha ramarango km-prako metric ton-prako gong 14-ko on·na sorkari tik ka·aha aro ia damrangko on·na cement karkanarangba ra·chakaha ine ua aganaha. Gipin a·dokrang, jekai Assam-ni palode a·dok sorkaride damrangko tik ka·e on·na man·jawa ine deputy chief minister agandapaha.
Transport minister ong·ani gimin an·tangko grongechina association-ni manderangko ua okamaha, indiba ia neng·nikaniara cement karkana aro salruragiparangni giseposa ong·a aro sorkari baksa nangeja ine ua talataha.
Mawryngkneng-o ong·gipa obostani gimin janape, sak 2-3 manderangko rim·aha aro police-rang am·sandianirangko dakange nanggipa ja·kurangko de·anggen ine Dhar parakataha.
Na·simang iakoba nina man·gen:
Na·simang iakoba poraina man·gen: Bhupen Hazarika-ko mande ra·ani bak gita bol 50 ringrang Tuni chibimao choa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
