Shillong, Aug 27: East Jaintia Hills-ni Wapung minggipa biapo donggipa KB Memorial Secondary School-ko kuligipa aro principal ong·enggipa Dr. Heipor Uni Bang, mingsinggipa National Teachers’ Award 2025-na seokako man·aha. September 5, Teachers’ Day-o Vigyan Bhawan, New Delhi-o President Droupadi Murmu una ia award-ko on·anggen.
India gimikoni sak-45 skigiparangko seokaha, aro Dr. Bang Meghalaya-oni dingtangmancha seokaniko man·aha. Iana skangba ua District Teachers’ Award (2021) aro State Teachers’ Award (2024) man·e, bidako gipatanio uni bimchipaniko mesokangaha.
Ia bilsio, Salgro-Salaram a·dokrangoni saksni skigiparang ia awardko man·aha. Uamangara: Nang Ekthani Mounglang (Arunachal Pradesh), Peleno Petenilhu (Nagaland), Koijam Machasana (Manipur), Karma Tempo Ethenpa (Sikkim), Dr. Heipor Uni Bang (Meghalaya), Bidisha Majumder (Tripura), arp Debajit Ghosh (Assam).
Ministry of Education-ni a·bachengatgipa National Teachers’ Award-ni miksonganiara a·songo donggipa nambatgipa skigiparangni on·gilanirangko gisik ra·na aro skianirangkosan ong·aija indiba skulrangko nambatatna aro chatro-chatrirangni janggi tanganirangko tang·doatgipa skigiparangkoba mande ra·na ine ong·a.
“East Jaintia Hills a·jani KB Memorial Secondary School-ni Principal aro Founder Dr. Heipor Uni Bang-na anga angni namgipa skaniko on·atenga. Ia chu·sokaniko man·aniara Meghalaya-na dal·bea rasongko ra·baa aro bidako on·anio uni bimchipani, namgipa kamko ka·ani aro on·gilaniko mesoka,” ine Meghalaya-ni skotong minister, social media-ni X-o gatataha.
Uandake 6-Khliehriat Constituency-ni MLA Kyrmen Shylla-ba Dr. Bang-ni chu·sokanina an·tangni nama skaniko on·aha. “Uni kam ka·anirang uni namen bimchipaniko mesoka. Ua Botany-o MSc-ko dake 2009 bilsio skigipani kamko a·bachengaha, uandake East Jaintia Hills-ni songrangona English-mediumko poraianiko sokatna inenba ua 2013 bilsio KB Memorial Secondary School-ko kuliaha. Japrako gong 200 dake komibee fee-rangko ra·e, ia skul ta·raken mingsingangaha aro 2015 bilsio, skanggipa changna chatro-chatrirangko SSLC porikka sena wataha,” ine Shylla parakataha.
“Dr. Bang skia-poraianio namen gisik nanggipa mande ong·a aro ua 2024 bilsio Environmental Management-o PhD-ko man·aha. Uni dilanichi, KB Memorial-o darangkoba watchanggija, chong·motan gisikni ba be·enni bilgriani donggipa manderang ba persons with disabilities-naba (PWD) skie on·anirangko dakna man·enga. Ua PWD chatro-chatrirangna indina poraina cholko on·aha aro bang·akon SSLC porikkarango chu·sokatna chol on·aha. Re·anggipa bilsio, saksa gisikni bilgriani sabisiko man·gipa chatro saksa letter mark-rangko man·e skanggipa division-ko man·aha, ian a·doko ong·ronggijagipa chu·sokaniko nikna man·aha. Uni kam ka·aniara bida-na uni on·kangani, niksamsoani aro on·gilaniko mesoka,” ine Shylla agandapaha.
Biapni dilgiparang, skigiparang aro United Democratic Party-ba (UDP) uamangni nama skaniko on·e, Dr. Bang-ni chu·sokani Meghalaya-na rasong chaani ong·a ine aganaha. “Uni on·kangani, niksamsoani, aro bimchipa kam ka·aniara skigiparangna, chatro-chatrirangna aro songsarna didianiko on·a,” ine UDP parakataha.
Na·simang iakoba nina man·gen:
Na·simang iakoba poraina man·gen: GHADC-o kam ka•giparang a•dok sorkari-ni rai-ko jegala
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
