Shillong, Oct 24: Shillong songjinmani Harijan Colony-ko jako ra·na parakanichi Meghalaya sorkari, Indian Constitution-ko pe·ani gita ong·aha ine ia jolni chadamberang matnangataha.
Harijan Colony-o songdongenggipa chadamberangni parakatani gitade, bilsi 200 skangonin uamangni pagitcham ma·gitchamrang ia biapo songdong a·chaahachim indiba da·o ia biapo songdongenggipa manderangko sorkari, gipin biapona apjitatna jotton ka·engani a·sel uamang a·songtangon naljokani gnang songdongna man·pajaengahachim.
“High court-ni on·gipa ge·etani aro pilak nangchongmotgipa lekkarang chingo dongachim indiba sorkari High Court-ni ge·etanikon manijaengani gimin ian Indian Constitution-ko chonnikaniba ong·enga,” ine Harijan Colony-oni saksa Rohit Singh aganaha.
A·songo songdongkamgipa manderangna a·songni je biapoba songdongna gita Indian Constitution-o bilko on·ahachim ine talatangengon, ia biapo songdongenggipa manderangko drae gipin biapona apjitataniara Indian Constitution-o on·gimin bilrangko pe·ani gita ong·enga ineba ua parakataha.
Ia biapo songdongenggipa manderangni gari gorarango re·ruraanirangko champengna a·bachengahani gimin uamang gisikni gita aro be·enni gitaba neng·nikanirangko chagrongna nangtokengaha ineba Harijan Colony-ni chadamberang parakataha.
Indake ong·engon, Harijan Colony-ni mamla da·o dipet kacharion ong·kuengani gimin da·o dipet ia biapo songdongenggipa manderangko gipin biapona apjitataniko champengchina aro Harijan Colony-o songdongenggipa manderangna nanga gita chel·chakanirangko on·china didie, Harijan Panchayat Committee-ni general secretary Gurjit Singh, East Khasi Hills a·jani Deputy Commissioner-na sedoataha.
Ia biapo songdongenggipa manderangni kosako sinjetanirangko dakna jotton ka·rongengani gimin ia biapo songdongenggipa manderangna chel·chakanirangko on·china ia committee, East Khasi Hills a·jani district administration-ko didiataha.
