Shillong, Feb 16: A·doko songdongenggipa manderangna adita rang·speani cholko on·na gita Meghalaya sorkari da·al salni bako daito gnanggipa ministerrang aro department-ni officialrang baksa tom·e chanchirimangani ja·man petrol aro diesel torangni damko komiatna gita tik ka·anganiko da·al attamchibara koborna parakataha.
Iana skang litre prako gong 2 ka·e komiataoniko a·dok sorkari da·ode Shillong-o petrolni damko litre prako gong 5.4 ka·e komidapatna tik ka·aha. Indake, ra·rone palgipa petrolni gital dam February 16 tarik, chong·motan da·al waljatchionide Shillong songjinmao litre prako gong 85.86 ka·e ong·skagnok jean a·dokni gipin district-rangode uni damrang on·tisa dingtanggen.
Indake ong·engon diesel toni damko iana skang litre prako gong 2 ka·e komiataoniko da·o uni damko Shillong-o litre prako gong 5.1 ka·e komidapatna gita sorkari tik ka·angskaaha. Indake, ra·rone palgipa dieselni gital dam da·al 16 tarikni waljatchionide Shillong-o litre prako gong 79.13 ka·e ong·skagnok jean a·dokni gipin district-rangode uni damrang on·tisa dingtangskagen
