Shillong, Feb 23: Meghalaya a·doko ILP aro MRSSA ia minggnikon ra·gatangna gita a·dok sorkari, ma·mong baksa dingchiken agangrikaniko dakenga ine dakchakgipa skotong minister Pa Prestone Tynsong mijalo u·iataha.
“Iako ra·gate on·anio ja·donggani donggen ba dongjawa iani giminde aganjaenga indiba ILP aro MRSSA ong·oba namdapatanirangchi chingna ia minggnikon nanga. Indiba, ian jensomoio Union Home minister-ni a·dokona re·baani somoio iani bidingo agangrikangani ja·manosa ong·aigen ine ua parakataha.
“Niam gri a·songgipinoni katbrangbae dongnapegiparangni gimin aganengon iako ma·sina nanggen, a·palchini katdobagiparangna an·chingo ma·mongni dongimin niam gnang, indiba ia mamlara India-ni ning·o donggipa manderangni giminsa ong·enga, uni gimin ia minggnio dingtanggrikani donga. A·songgipinchini katbrangbae songdongegiparangna agangimin gita ma·mongni dintang niam donga, indiba iade a·dok sorkarini chanchiani bakan ong·ja. A·dok sorkarini da·o chanchianira, a·bri jatni manderang chong·mot ong·aniko aro jatni daka-rikanirangko maidakgipa niamchi chu·gimik chel·chakaniko on·na man·gen iasa ong·enga, uni giminsa batanggimin 2016 bilsio ra·chakanggimin MRSSA-ko assembly-o chinga ra·chakattaie a·dokni manderangna chel·chakaniko on·aniko bilakdapatna nangnikenga,” ine ua agankuaha.
A·dok sorkarini da·o ILP-ko a·doko ra·gatna nangnikaniara, Citizenship Amendment Act (CAA)ko a·songo ra·chakanganichi a·songgipinchini niam gri katdobae songdongenggipa manderango nanchape jajrengsoanirang dongani gimin ong·aha ine aganenba, “niam gri katbrangbagipa manderangni gimino chinga namen jajrengsoa, indiba agangimin gita ian ma·mong sorkarini chanchianisa ong·a, indake ong·oba a·dokni pilak songdongkamgipa manderangna chu·gimik chelchakaniko on·anina a·dok sorkarini chanchianiara chelchakaniko on·ani inon chu·gimik ong·na nangenga, uni giminsa chinga da·alo ILP aro MRSSA ia minggnikon dabienga,” ineba dakchakgipa skotong minister aganaha.
Sixth Schedule-ni a·palo ong·gipa gni ba gittam percent-mang a·arangona agre, Sixth Schedule ning·o ong·gipa biaprangode ia niamko ra·gatangjawa ine Pa Tynsong, sing·anina aganchakengon, Meghalaya a·dok gimikkon CAA-ni niamoniko chu·gimik naljokaniko on·na gita ma·mong sorkario chinga a·dokni ia gni ba gittam percent-mang bangki biaprangkoba Sixth Schedule-o napatchina dabienga ine agane, iani gimin chinga mikkang jao ma·mongni home minister baksa agangrikangtaigen ine Pa Tynsong ka·dongatanikoba on·angjolaha.
