Shillong, Jylliew 20: U Nongialam ka Liang Pyrshah u Bah Titosstarwell Chyne hynnin ka sngi Thohdieng, ula pyrshah jur hapoh ka dorbar jong ka Khasi Hills Autonomous District Council ha ka jingiatai halor ka mang tyngka bad ula buh jingkylli halor ka rukom pynkylla na ka jingmang pisa kaba bun sha ka jingmang ia ka pisa kaba duna bad ula pyrshah ruh ia ka jingpynkylla ne Amendment ia ka KHAD Regulation and Administration of Land Act.
U Bah Chyne kynthoh ia ka rukom long rukom ha kaba iadei bad ka pisa pilain tang hapoh jong ka shi snem.
“Nga pynpaw ia ka jingsngewkhia namar shi snem mynshwa phi lah wanrah ia ka mang tyngka kaba bun hynrei mynta u snem la wanrah da ka mang tyngka kaba duna pisa. Ngam tip na ka daw aiu, tang hadien shisnem ba la wanrah ia ka mang tyngka kaba bun, mynta phi kren jam halor ka jingpynlut kaba pynlut phut. Kata ka mut ba kala don ka jingpynlut phut kai kaba la pynlong ia ka mang tyngkat ban duna pisa” ula ong.
U Nongialam ka Liang Pyrshah ula kynthoh tyngeh ia ka Executive Committee kaba la wanrah ia ka jingtyrwa ban pynkylla noh ia ka Land Act. Ula pynpaw ba ha ka Section 16 jongka Act ka pynkup bor bad dei ban don shwa ia ka jingiasyllok bad ki Dorbar ki bapher bapher hashwa ban pynmih ia kano kano ka jingpynbna paitbah ne Notification.
“Kaei kaba la pynkyndit ia nga, ka long ba ha kane ka jingpynkylla kaba phi lah wanrah, phi lah pynduh noh ia ka Section 16 ia ka kyntien ‘hadien ka jingpyndep ia ka jingiasyllok bad ki Dorbar’. Balei phi pyndam noh ia ka bor jong ki Dorbar Shnong, ki Raid, ka Hima, haba phi kwah ban pynmih ia ka Notification bad ki?” la kylli u Bah Chyne.
Ula pynpaw ba ia kane ka aiñ la shna ban iada ia ki Khasi kiba longtrai ia ki jaka bad ka Council kam don satia ia la ka jong ka jaka. “Namar ba phi lah ktah ia ka Land Act, Nga nud ban ong, ba phi lah ktah ia ka dohnud ka jong nga, namar ba ngi lah shna ia ka Land Act ban pynlong ain bad pynkhlain ia ki paid Khasi ha ka jinglongtrai ia ka jaka. Lada phim donkam shuh ia ka bor jong ki shnong, iathuh ia nga, naei ka District Council ka ioh ia ki jaka? Ka District Council kam ju longtrai ia ki jaka wat tang shi inshi ruh. Baroh ki jaka kidei ki jong ki Hima, ‘ri Kynti’ bad ka Raid. Hato kin ailad ia ka KHADC ba kan shu pynmih ia ka Notification khlem da iasyllok bad ki?” ula ong.
U Bah Chyne ula pyrshah shuh shuh ia ka jingwanrah ia ka Unique Land Parcel Identification Number bad Digital Survey Provision lyngba katei ka Amendment.
“Nga kwah ruh ban kren halor ka Amendment kaba phi lah wanrah. Haba peit ia ka Amendment kaba phi lah wanrah bad pynrung ia ka Section 8 bad kiwei kiwei ban sdang ia ka Digital Session, ban wanrah ia ka Unique Land Parcel Identification Number, ban ioh pyniaid shakhmat ia ka Survey. Kumta kadei kaei kane ka Unique Land Parcel Identification Number? Hato kadei kaba la pyniasoh bad ka Sorkar India? Lada kadei kaba la pyniasoh bad Sorkar India, kumta ka imlang sahlang ka don hapdeng ka jingma. Ka rukom wanrah ia ka Amendment kala pynduh bor noh ia ka jingthmu jong katei ka aiñ” ula ong.
Ula pan jingpynshai ruh ha kaba iadei bad ka jingpynkhreh ka Council ia ki kyndon jongka 16th Finance Commission.
“Ka 16th Finance Commission ka don ia ka Basic Performance Grant kaba 20%. Kaba mut na ka liang jongka KHADC, lada ka Sorkar India ka ai 80%, kumta 20% hap ban pyni da ka liang jongka KHADC. Nga kwah ban tip hato kane ka EC kala long kaba pynkhreh na ka bynta kane” ong u Bah Chyne.
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
