Ai jingkyrmen ka Sorkar ia ki nongtih par
Shillong, Naitung 12 : Ka State Coordination Committee of Coal Owners, Miners, Exporters & Dealers’ Forum ha ka sngi U Blei kala ai khublei ia u Myntri Rangbah ConradK Sangma namar ka jingshimkhia ia ki sienjam ban sdang biang ia ka jingtih ia ki par dewiong bar it da ka jingstad saian, ka ban long da ka jingtih krem ha Meghalaya.
U Chairman ka Forum Bah Sonny L Khyriem ula iathuh ba ka kynhun kala iakynduh ia u Myntri Rangbah ha ka 22 tarik Jylliew, 2026 bad aiti ia ka dorkhas bad jingbatai halor ka jingsdang biang ia ka jingtih par da ka jingstad saian.
Ula ai burom ia ka jingbuddien u CM hadien ka jingleit iakynduh jong u ia u Myntri ka Ministry of Coal & Mines ha New Delhi halor ka jingiaid ka kam.
“Ka jingshimkhia mardor bad ki kam bala leh da u Myntri Rangbah…kila plie ia ka lynti ba thymmai ba kumno ka jingtih dewiong ka lah ban sdang biang hapoh ka Jylla” ong u Bah Sonny.
Kat kum ka jingong jong u, u Myntri ka Sorkar Pdeng ula kular ban thaw ia ka Committee hapdeng ka Sorkar Pdeng bad Sorkar Jylla, ban iapynbeit ia kiei ki kam kiba lah ban leh.
“Ka Forum….ka ai khublei shibun eh da ka jingsngewnguh kaba khraw ia ka jingshimkhia u Myntri Rangbah ha ka por kaba biang bad ka don jingkyrmen ba kine ki jingpyrshang kin longkam kham kloi kat kaba lah, ka ba wanrah jingkyrmen ki jingtih dewiong kiba la mad ia ka jingjynjar la slem bha namar ka jingkhang tih dewiong” ula ong.
U Bah Sonny ula pynpaw ia ka sngewnguh ruh ia ka jingai jingkyrshan na ki Symbud Myntri Rangbah Bah Prestone Tynsong bad Bah Sniawbhalang Dhar, MLA Bah Kyrmen Shylla, Bah Gabriel Wahlang, kong Santa Mary Shylla, Bah Pius Marwein bad MLA barim Gigur Myrthong, Shitlang Pale bad Justine Dkhar ia ka jingleh ki nongtih dewiong.
