Shillong, Naitung 27 : Ka Kynhun Myntri ka Sorkar Jylla ha ka sngi Nyngkong kala ai jingmynjur ia ki jingpynkylla kiba kongsan ba kynthup ia ka jingkyntiew kyrdan ia ka New Shillong Township Development Agency sha ka New Shillong Authority, ka jingthaw ia ka Border Research Wing bad ka jingpynkylla ia ka GST Act ka Jylla.
Haba kren sha ki lad pathai khubor hadien ka jingialang bala pyniaid da u Myntri Rangbah Conrad K Sangma, u Myntri Sorkar Marcuise N Marak ula ong ba ka kynhun Myntri kala mynjur ban pynkylla ia ka New Township Development Agency Rules 2012.
“Ia ka Agency la thaw thymmai biang kum ka New Shillong Development Authority. Mynshuwa kala treikam kum ka Agency. Da kane ka jingpynkylla, mynta kan treikam kum ka Authority” ong u Marak.
Ka kynhun Myntri kala mynjur ruh ban pynkha ia ka Research Wing hapoh ka Meghalaya Border Areas Department.
“Ia ka Research Wing la dep ban ai jingmynjur. Ka Tnad mynta kan thaw ia ka service rules kaba donkam bad ban pynbiang ia baroh ki jingdonkam” ong u Myntri.
Na ka bynta ka jingrakhe Independence Day 2026, ka Kynhun Myntri kala buh ia ki VIP ba kin leit shim salute ha baroh ki district headquarter ha kylleng ka Jylla.
“Ki Ophisar kin sa iasyllok bad ki Myntri ban pynthikna ia kano ka district ba ki kwah ban leit na ka bynta ka jingrakhe la 15 tarik Nailar” ong u Marak.
Ha kawei pat ka rai, ka Kynhun Myntri kala mynjur ban pynkylla ia ka Meghalaya Goods and Services Tax Act da kaba wanrah ia ka Ordinance.
“Kane ka long kat kum ka rai bala shim da ka GST Council, ka Sorkar India. Kano kano ka rai bala mynjur da ka GST Council ka dei ia kaban rai pyntreikam da ka kynhun Myntri ka Jylla. Ngi la mynjur ia ka kat kum ki kyndon ka GST Council” ula bynrap.
Pule ruh : Husiar na ki jingpang lyiur | Maham ka Sorkar ban bam tit khlaw, pynjaboh ia ki um da ki dawai
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
