Jowai, Sept 20: West Jaintia Hills-ni Syndai songo adita sak gipin jatrangni nanggipa lekkarang gri kam ka·enganiko nike badi ka·doanganiko man·soeming Jaintia Students Union (JSU), Syndai Unit uamangni general secretary Heiplanmiki Tariang-ni dakdilanichi kakketko u·ina gita sandirikkitataniko dakangaha.Sandiatanio, an·tangtangni gimin maming sakkiko on·na man·gija nanggipa lekkarang gri adita sak gipin jatrangni kam ka·tokenganiko ma·siani ja·man union-ni manderang uamangko rim·e Muktapur Border Outpost-ni police-ni jako pakwateaha. Police-na pakwatatani bidingo union-ni talatani gitade, a·doko ILP-ko ra·gatchina dabiani bak gita aro joltangni manderangni man·gniko chel·chakani gita iako dakataha ine parakataha.

Indakeba janapjolna man·gen je, a·doko ILP-ko ra·gatchina dabie re·anggipa jao union, dingtang dingtang dakgipa jingjengatanirangko ong·atangaha jeoni a·palchini re·bae kamko ka·enggipa gipin jatrangni lekka ba document-rang jekai Labour License aro Trading License iandakgiparangko nirikkiatna gita a·bachengaha.