Shillong, May 15: North Eastern Institute of Ayurveda & Homoeopathy (NEIAH)-ni project II ning•o gital rikgipa building damdokko Sombar salo, Union Ports, Shipping & Waterways aro Ayush Minister Sarbananda Sonowal nokdonggae on•angaha.
Ia building damdokko rikanio gong crore 60.16-na baten koros ong•ahachim aro ia building damdoko sak 104 chatrorangna biap donggipa Boys hostel, sak 104 chatrirangna biap donggipa girls hostel, Type III quarter-ni unit 8, Type IV A quarter-ni unit 6, Type IVB-ni unit 7 aro director-ni dongchakani, unit 25 donggipa hostel aro ge 19 kuturirang baksana suite ge 2 donggipa guest house-rang donga.
Ia gital rikgipa building-rangko nokdonggae on•angani somoio Union Minister Sarbananda Sonowal, jinmana aganprakangengon, ia gital building-rangko Shillong-o nokdonggae on•na man•ahani gimin an•tangni kusi ong•aniko parakangenba, ia gital building-rangko rikanichi salgro salaram jolrango jatni samrangko tang•doatna kam ka•enggipa NEIAH-ko nambatatna dakchakgnok ine parakataha.
A•songni Prime Minister Narendra Modi-ni dilanichi a•songo jatni samrangko tang•doatna sorkari kamko ka•enga ine janapatengon, bakan NEIAH, ambulance service-rangkoba a•bachengatgnok ine parakataha.
