Tura, Feb 23: Williamnagar jilani Simsang chibima rikam jolrango donggipa adita dam songrangni manderangna namgniko on·angnasigipa Nengmandalgre songo chu·gimik gong kror 2.5 tangka-paisarangchi gital rikatgipa PHC nokko Tura Lok Sabha-ni MP Ma Agatha Sangma, MLA-rang Pa Marcuise Marak, Jim Sangma aro MDC Pa Denang Sangma-maang gimikni dongpaanio a·dokni skotong minister Pa Conrad K Sangma, Mongolbar salo nokdonggae on·aha.
Nengmandalgre PHC-na agreba, Nengmandalgre-oni Daribokgre-ona km 35 mang ong·gipa aro Cherangre-oni Sisobibra-ona km 7.82 mang ong·gipa rama dilgnirangko PMGSY-ni ning·o tarichakatna gita pangchakaniko songe on·anganiko songni-nokni manderang salni tom·anio nikangjolna gita man·aha.
Williamnagar, Nengmandalgre-o PMGSY-ni ning·o rama dilgniko gital tarichakatna pangchakaniko songe on·ao jinmana aganprakengon, a·jani manderangni namgnina nangchongmotenggipa adita ge ramani project-rangko Meghalaya a·doko a·bachengatna gita man·aha ine aganan baksa, a·doko rama-jal·langrangko tarina aro namdapatna gita ma·mong sorkariba gisik srongen tangka-paisarangko on·atenga ine a·dokni skotong minister Pa Conrad K Sangma u·iatjolaha.
15th finance commission-oniko India sorkari, tangka gong kror 500-ko on·ataha, jechin a·doko sana-bananina mongsong nangchongmotgiparangko ra·dona gita dakchakani ong·gen ine u·iatan baksa, World Bank-oniko tangka gong kror 350-koba a·dokna on·ataha ine agane, 15th Finance Commission-ni chanchie ra·bagiminrangko ra·chakanina India sorkarikoba ua mittelangjolaha.
15th finance commission-ni agan-ku·pattianirango pangchake, a·dokni district councilrang aro municipalnaba tangka-paisarangko chamgen. PMGSY ramarangko simsak-nirokatanina tangkarangko chamani giminba 15th FC agan-ku·pattiaha aro PMGSY ramarangko namdapatna gita tangka gong kror 500-koba a·dokna on·ataha ineba Pa Sangma u·iatjolaha.
Ia bilsina union health budget-ko gong kror 10000-ona bariatanichi Garo Hills a·jao sana-bananina mongsong nangchongmotgiparangko aro sana-banani cholrangko namdapatanio namen dakchakani ong·gen ine aganenba, a·doko sana-bananina mongsong nangchongmotgiparangko namdapatna skotong minister Pa Conrad Sangma-ni kamrangko ka·atanina Tura Lok Sabha-ni MP Ma Agatha Sangma, uko mittelpilangaha.
Tom·ao dongpae aganengon, a·dokni skotong minister Pa Conrad Sangma-ko a·doko pilak namroro-silroroaniko ra·bana man·na gita mikkangchina niksamsoa gnang gisiko nangen kamrangko ka·atenga ine Williamnagar-ni MLA Pa Marcuise Marak, dingtangmancha de·mittele aganangaha.
