Tura, April 22: Garo Hills Autonomous District Council (GHADC)-o kam ka•enggiparang, bilsi gittam ong•na sipile dormaharangko man•tokkujaengani gimin Bristibar salo Non Gazetted Employees Association (NGEA)-ni dilgiparang, gital seokako man•gipa chief executive membor (CEM) Benedic R Marak-ko grongeaha.
GHADC-o kam ka•enggiparang indita jarangni dormaharangko man•tokkujaengani gimin kamtangtangko ka•gija jabrimangna jingjengatanirangko daktokengachim ine nikna man•a.
“NGEA-ni dilgiparang angko gronge uamangni neng•nikanirangko aganeaha aro chingaba uamangni neng•nikanirangko namatna man•na gita kamtangtangko ka•epilchina gita mol•molataha,” ine Bristibar attamo, GHADC-ni CEM Benedic Marak, kobor ra•timgiparangna parakataha.
Marak-ni parakatani gitade, GHADC-o kam ka•enggipa manderangni nangnikanirangko chu•sokatna gita somoirangko nangkugen aro uandaken Bristibar salo dolgnini agangrikani chu•sokgipa ong•na man•jaha.
“GHADC-o kam ka•enggiparangni nangnikaniko chu•sokatna gitade chingna somoirangko nangkugen indiba chinga uamang baksa agangrikna pangnan do•gako oe donenga,” ine GHADC-ni gital CEM parakataha.
GHADC-o kam ka•enggiparangni kam dontongate jingjengatengani a•sel district council-na bang•en noksan ong•engani gimin janapatengon, GHADC-o obostarangko namatpilna gita pilak cholrangkon sandienga ine Marak parakataha.
“Kamrangko dontongate jingjengatenggiparangoni bak 70-de kamtangtangona re•bapilna sikenga ine chinga ma•sia aro bang•gija manderangsan jingjengatanirangko dakangkuna nangnikenga. Chinga uamangko Sombar salonin kamtangtangko ka•pilchina didienga indiba uamang somoirangko nangdapkuenga gita nika,” ine Marak aganaha.
GHADC-o kam ka•enggiparangna bilsi gittam ong•na sipile dormaharangko on•kujaengani gimin aro GHADC-ni secretary Rikse R Marak-ko kam ra•jitangkujaengani gimin jegale GHADC-o kam ka•enggiparang kamrangko ka•gija jingjengattokengachim ine nikna man•a.
