Williamnagar, Feb 17: Williamnagar jilaoni Federation of Khasi-Jaintia and Garo People (FKJGP), Garo Students’ Union (GSU), Mothers Federation, Federation of A·chik Freedom (FAF), A·chik Holistic Awakening Movement (AHAM) aro Mothers Union, iarang gimikni nangrimgimin dol ba NGO, Williamnagar Civil Hospital-ni labour room ba bi·sako an·pakchakgipa kutturio kam ka·gipa saksa doctor aro sakgni nurse-rangni simsakgijaniko janapenba uamang sakgittamni kosako badi ka·angaha.
Uamangni badi ka·doanggipara bi·satangko atchiatna hospitalona rimbaako man·gipa Williamnagar, Balsrigittim songoni saksa Pipi Sangma-ni obostao nangchapachim.
NGO-rang, iani bidingo mijal Mongolbar salo East Garo Hills a·jani Deputy Commissioner-na lekka sedoangaha, jeon uamang bi·sako atchiatmitingo uno kam ka·giparang simsakgija bi·sako dustbin-o ga·akataha ine hospitalo donggipa man·gipa aro uni ma·detang Belnitha Sangma-mangni matnanganiko janapataha.
“Ia ong·a obostako bilko jako ra·enggiparangna u·iatode uamangko chu·gimik sanjawa ine saksagipa nurse, saenggipa me·chikmani nogipa ba abitang baksa jegrikaha. Pringgipino, chong·motan mija February 14 tarikoba ua nurse-an bi·sani ma·gipa baksa jegriktaikuaha jenan ua me·chikma grape dongaha aro an·tangni janggikoba bon·atna gita chanchiona sokpilaha,” ineba NGO-rang janapatkuaha.
Iarang gimikon aro nokdangni manderang aro NGO-rangni matnanganirangko raken jegalatenba, hospital ning·ao maming daken simsakgija kam ka·atani obostarang ong·a dongja ine East Garo Hills-ni DMHO talatskaaha.
“Ia ong·a gimikko anga an·tangan u·ia aro ua me·chikma an·o dongani jadoksan ong·kuengachim aro uko hospitalona rimbana skang maming check-up ka·a ba porikka ka·e niata dakkujachim. Jensomoio sabaenganiko aganon, chinga uko labour room-ona ra·angaha jeon sakgni nurse-rang aro saksa doctor chu·gimik kamkon nirokataha,” ine DMHO taldapataha.
U·iatani gitade, bi·sa rang·san ong·katbaaha aro ja·mano ma·gipani bibal (placenta) rang·sanan amniotic fluid baksa ong·katchape nurse-rango tang·dapaha. Iana jagoke nurse-rang chrikaha jekon uamang ka·a nange manenga-saia ine chanaha.
“Bi·sa atchiani ja·man uni sambao dongipa sera-berako galgipa baltinona ga·akonaha. Indakmitingo chingni gisikan bi·sani ma·gipanasa ong·batronga aro uni bibal ba placenta-ko rate gale bon ka·jaode ma·gipani janggina kenchakani dongachim. Indake, ja·manosa bi·sani dusbino ga·akonakode u·itokaha,” ineba DMHO agandapaha.
Hospital-oniko koborko man·soani gitade ua atchidaldal bi·sani jrima 900 gram-san ong·aiachim aro bi·sa bakgitchakko dongipa incubator-ona uko ra·angna skangba Sick Newborn Care Unit (SNCU)-ona ra·angchengna nangaha. Indake ong·engon, bi·sani obosta da·omitingde namsranga ong·kujaenga, indiba DMHO-ni aganani gita bi·sako naljokatna gita doctorrang amadipetde jotton ka·enga.
“Maming ong·gijako aganani gimin sing·ani kattan dongja, maina bi·sako atchiatmiting somoion saksa doctor-ba uno dongchape nirokataha. Salgipino uamang hospitaloniko bi·sako rimangna am·on bi·sani obostako u·ie chinga rimangna on·jaha aro bi·sako watna skangba nokdangoni see-jote on·aniko chinga am·aha, indiba uamang ukoba dakna jechakaha,” ine DMHO taldapataha.
Unomiting, East Garo Hills a·jani Deputy Commissioner, Swapnil Tembe, ia mamilako namedake sandirokatgen ine parakataha.
